Откриени се сериозни недостаоци во работата на жичницата по деталните проверки од реномираната австриска фирма „Допелмаер“, откако тоа го побарал скопскиот градоначалник, Орце Ѓорѓиевски. Тој во телевизко гостување обелодени дека извештајот покажал оти носечките и влечните сајли биле оштетени далеку под секој дозволен безбедносен минимум, додека дури три од вкупно четири безбедни сензори за движење на кабините воопшто биле надвор од функција.
-Во Швајцарија имало несреќа пред неколку години во која, за жал, загинала госпоѓа. Несреќата се случила поради нефункционалност на еден од четирите сензори за движењето на кабините. Кај нас три од четири не функционираа – изјави скопскиот градоначалник.
Токму поради овие застрашувачки откритија, жичарата била итно и без одложување исклучена од сообраќај за да се спречи катастрофа.
Ѓорѓиевски истакна дека договорот за целосна ревитализација веќе е склучен со „Допелмаер“, а стручни тимови од фирмата се очекува наскоро да пристигнат на терен заедно со оригиналните деловни компоненти.
При тоа, најави дека по завршувањето на техничките зафати, системот ќе мине низ најригорозни тестови сè до добивање официјален меѓународен сертификат за сигурност, но и дополнителна обука за вработените кои треба да ги вршат редовните сервиси и проверки.
За да ја потврди безбедноста на објектот пред јавноста, градоначалникот најави дека првото тест-возење по рестартирањето ќе го направи лично тој, заедно со директорот на Јавното сообраќајно претпријатие „Скопје“ и своите деца.
Крајниот рок за завршување на комплетната реконструкција е предвиден до крајот на ноември, по што жичарата повторно ќе им биде ставена на располагање на скопјани и туристите за време на претстојната зимска сезона, со вообичаените безбедносни паузи во деновите со силен ветер.
