САД повеќе нема да посредуваат во мировните преговори меѓу Украина и Русија откако Владимир Путин одби да се согласи на прекин на огнот, соопшти американскиот Стејт департмент.
„Ја менуваме методологијата на нашиот придонес во преговорите“, рече Вашингтон, додавајќи дека САД повеќе нема да „летаат низ светот за секоја најава за состанок“.
Оваа одлука доаѓа кратко откако САД потпишаа нов договор за минерали со Украина под поповолни услови од претходно очекуваните. Во исто време, медиумските извештаи укажуваат дека Доналд Трамп ја одобрил првата испорака на оружје во Киев за време на неговата администрација, пренесе „Телеграф“.
Стејт департментот соопшти дека Киев и Москва сега мора да презентираат „конкретни“ предлози за завршување на војната и дека двете страни треба директно да се сретнат за да го решат конфликтот.
Доналд Трамп, според извори блиски до неговиот кабинет, е сè повеќе фрустриран од однесувањето на рускиот лидер.
Најновите проценки на американските разузнавачки служби сугерираат дека Путин сега е во послаба позиција и ги редефинирал целите на војната, фокусирајќи се на зачувување на територијалните придобивки остварени досега.
