вторник, ноември 17, 2026
Дома СВЕТ Путин наводно дал зелено светло за ликвидација на Зеленски

Путин наводно дал зелено светло за ликвидација на Зеленски

0
EPA/SARAH MEYSSONNIER

Русија наводно ја укинала неформалната забрана за напади врз украинскиот претседател Володимир Зеленски и највисокото раководство на вооружените сили на Украина, пишува рускиот весник „Московски комсомолец“, кој се смета за близок до властите во Москва.

Весникот пренесува дека одлуката била донесена за време на состанок зад затворени врати на Советот за безбедност на Русија. За овој наводен потег известија и неколку други руски медиуми, како и воено-политички канали на „Телеграм“, повикувајќи се на неименувани извори.

Се тврди дека претставници на руските безбедносни служби побарале овластување за физичка елиминација на највисоките политички и воени функционери на Украина.

Информациите за оваа наводна одлука се појавија во петокот, на 13 ноември. Според извори на кои се повикуваат руските медиуми, една од главните причини за ваквиот предлог се тековните напади врз Ленинградската област – конкретно насочени кон извозен центар на Балтичкото Море и пристаништето Уст-Луга.

Како дополнително оправдување, Москва тврди дека Украина целосно преминала кон методи на меѓународен тероризам.

Изворите наведуваат дека руските безбедносни служби побарале прекин на постоечкиот премолчен договор, според кој Зеленски и неговите соработници не се сметале за директни цели за напади.

Учесниците на наводниот состанок заклучиле дека претходната стратегија на пасивна одбрана ја изгубила својата цел.

Според нивната проценка, дури и значителни финансиски вложувања не можат да го заштитат секој дел од руската територија од напади со беспилотни летала. Тие исто така сметаат дека руските одмазднички удари врз мостовите и енергетската инфраструктура во Украина не успеале да ги запрат нападите врз руските објекти.

Како резултат на тоа, според извештаите на руските медиуми, безбедносните служби предложиле порадикален пристап: насочена елиминација на поединците кои издаваат наредби за напади врз руски цели.

За можните руски планови за елиминација на украинското раководство зборуваше и Михајло Подољак, советник на украинскиот претседател.

Според него, уште на почетокот на инвазијата во февруари 2022 година, Москва планирала брза победа преку испраќање групи во Киев, со цел ликвидација на највисоките украински функционери. „Примарната цел на Русија беше да го отстрани највисокото раководство на земјата, да предизвика максимална паника и да се обиде да постави своја, марионетска влада“, изјави Подољак.

Во написот во „Московски комсомолец“ исто така се наведува дека, според проценката на авторот, Зеленски е свесен за можноста Русија да преземе построги мерки против него.

ИЗДВОЕНИ