Поранешен припадник на ОВК Фадиљ Пушколи вчера бил приведен на „Блаце“, по испрашувањето бил ослободен

Приведен па ослободен синоќа бил Фадиљ Пушкољи, припадник на поранешната ОВК, на граничниот премин на македонско-косовската граница Блаце, врз основа на српска потерница, објави српската агенција Танјуг.

На својот профил на Фејсбук, Пушкољи навел дека бил уапсен „поради неговото членство во ОВК“. Пушкољи, кој е сопственик на косовскиот медиум „Косова пост“, истовремено побара помош од косовските власти. Подоцна вечерта тој напиша дека, откако полицијата извршила со него разговор и испрашување, бил пуштен.

Пушколи во вечерашната објава ѝ се заблагодарува на македонската полиција и посебно на Албанците во нејзините редови.

-По разговорот и испрашувањето, бев ослободен од полицијата на Северна Македонија. Сакам да ѝ се заблагодарам на полицијата на Северна Македонија, особено на полицајците Албанци, за коректноста, почитта и доброто однесување во текот на целата постапка. Ви благодарам за коректноста и професионалноста! – напиша тој.

Официјално нема достапни информации кои би потврдиле дека Пушколи е баран од Србија, како што првично беше објавено. Македонските институции досега не соопштија ништо за вечерашното приведување на косовскиот сопственик на медиум.