Полскиот министер за одбрана Владислав Косињак-Камиш ја повика Европа да ја прилагоди производството на оружје и муниција на воени услови.
Тоа го смета за неопходен одговор на зајакнувањето на руската војска. За зајакнувањето на европските воени капацитети, забрзувањето на производството на вооружување и обезбедувањето на синџирите на снабдување, Косињак-Камиш во Варшава разговарал со европскиот комесар за одбрана и вселена Андриус Кубилиус.
„Лично се залагам за премин кон воен модел на производство на оружје и муниција ширум Европа“, порача тој по состанокот.
Тој објасни дека Русија веќе функционира на тој начин и дека Европа повеќе не смее да биде пасивна.
Министерот дефинираше и три приоритетни области за европските одбранбени инвестиции. Тоа се ценовно достапни системи за прецизни удари со голем дострел, беспилотни летала и противдронски системи, како и вештачка интелигенција.
Косињак-Камиш побара и поголема флексибилност во европската одбранбена набавка. Според неговото мислење, итното купување опрема треба да биде можно и од сојузниците во НАТО надвор од Европската унија, особено кога европските производители не можат да ја испорачаат опремата доволно брзо.
„Предлагаме, во случај на критични набавки кои бараат брза испорака, а кога таа опрема не е можно да се набави внатре во Европската унија, да се отвориме кон нашите сојузници во НАТО кои можат да ни помогнат“, изјави министерот.
Предлогот на полскиот министер отвара прашање за рамнотежата во европската одбранбена политика. Од една страна, целта е зајакнување на домашната индустрија за оружје, а од друга – итна потреба за воена опрема како одговор на војната во Украина.
Таквата промена на правилата би можела да им одговара на производителите на оружје во земјите членки на НАТО кои не се во ЕУ, како Турција, Велика Британија и САД, иако полскиот министер не наведе конкретни држави или добавувачи.
