Во Полска денес и утре се одбележува период на жалост по убиството на девет лица во Краков. Полскиот министер за национална одбрана, Владислав Косињак-Камиш, изјави дека инцидентот претставува терористички напад. Министерот за внатрешни работи, Марчин Кервињски, посочи дека е во тек истрага, при што сите индиции укажуваат на тоа дека осомничениот бил фасциниран од крајнодесничарски идеологии. Знамињата низ целата земја се спуштени на половина копје, а сите забавни настани се откажани.
Полските власти соопштија дека во нападот во Краков загинале девет лица, меѓу кои и еден британски државјанин. Меѓу 16-те повредени има пет странски државјани – од Австрија, Германија, Португалија, Русија и Велика Британија.
Полскиот вицепремиер и министер за национална одбрана, Владислав Косињак-Камиш, изјави дека пукањето во центарот на Краков било терористички чин насочен против жителите и туристите, додека министерот за внатрешни работи, Марчин Кервињски, истакна дека осомничениот застапувал многу радикални, најверојатно крајнодесничарски ставови, пренесе „Танјуг“.
„Се случи напад – терористички чин – насочен против жителите и туристите кои се наоѓаа во Краков“, изјави Косињак-Камиш на прес-конференција во Краков, упатувајќи сочувство до семејствата на жртвите, пренесува „Полсат њуз“ (Polsat News).
Во Краков е прогласена жалост која ќе трае до 11 ноември, по нападот на Главниот плоштад, при што напаѓач пукал неселективно кон минувачите, убивајќи шест лица и ранувајќи 15.
„Прогласив период на жалост во Краков, кој ќе трае до 11 ноември“, изјави градоначалникот на Краков, Лукаш Гибала.
Тој вчера потврди дека во градот заседава кризен штаб, во кој учествуваат министерот за внатрешни работи Марчин Кервињски и премиерот Доналд Туск. Полицијата на Малополското војводство соопшти дека напаѓачот убил шест лица – четири жени и двајца мажи – а ранил најмалку 15 други, меѓу кои и двајца полицајци.
„Сè укажува на тоа дека тој пукал неселективно кон минувачите. Се движел низ Главниот плоштад и се упатил кон населбата Казимеж. Прерано е да се каже за што точно ќе биде обвинет“, изјави обвинителот Томаш Вашчук.
Напаѓачот се подготвил за нападот и бил тешко вооружен; полицијата потврди дека во багажникот на неговиот автомобил биле пронајдени неколку парчиња оружје и големо количество муниција. Според неофицијални информации, тој носел и панцир.
„Бил облечен во паравоена униформа и вооружен со долго воено оружје – веројатно полуавтоматска пушка АР-15. Во автомобилот беше пронајдено големо количество оружје и муниција“, изјави за полската телевизија ТВН24 (TVN24) Катажина Цисло, портпарол на регионалната полиција во Краков.
Полската полиција соопшти дека станува збор за 24-годишен полски државјанин, додека полските медиуми, повикувајќи се на неофицијални извори, пренесуваат дека тој можеби е воено лице.
Според информативниот портал Onet.pl, мажот со црно „Субару“ – регистрирано на име на неговиот 52-годишен татко – влегол на Главниот плоштад во Краков, место кое околу 15:00 часот обично е преполно со туристи. Таткото поседува дозвола за носење оружје и е сопственик на најмалку 11 парчиња огнено оружје од различен вид. Полските власти апелираат до јавноста да се потпира на официјални информации, бидејќи на социјалните мрежи веќе се појавија бројни видеа од пукањето – од кои многу се лажни, создадени со помош на вештачка интелигенција – како и многу шпекулации и дезинформации.
Премиерот Доналд Туск ги повика политичарите од целиот политички спектар да се воздржат од какви било обиди за собирање политички поени врз основа на оваа трагедија, пренесе „Бета“.
