Откриено како содржината на состаноците во ЕУ стигнувала до ушите на Русите! Сијарто на Лавров – „Секогаш сум ви на располагање“/АУДИО

Среде скандалот околу можното пренесување на детали од состаноците на лидерите на ЕУ во Москва, новинарите на порталот „ВСквер“ објавија снимка од разговор меѓу унгарскиот министер за надворешни работи Петер Сијарто и рускиот министер за надворешни работи Сергеј Лавров

Снимките, како што објави „Инсајдер“, покажаа колку длабоко Будимпешта работела за интересите на Кремљ во рамките на Европската Унија. Во тие разговори се слуша како Сијарто пренесува доверливи детали од Брисел до Русите, се обидува да ги отстрани руските имиња од списокот на санкционирани лица и нуди помош за спасување на руските компании од европските санкции.

Еден од највпечатливите разговори се случил на 30 август 2024 година, само еден час откако Сијарто се вратил од Санкт Петербург во Будимпешта.

Лавров му се јавил и веднаш преминал на главното: рускиот олигарх Алишер Усманов сакал неговата сестра Гулбахор Исмаилова да биде отстранета од списокот на санкции на ЕУ.

-Слушај, се јавувам по барање на Алишер и тој само ме замоли да те потсетам дека си направил нешто во врска со неговата сестра, вели Лавров.

🚨BREAKING: Orban mafia removed EU sanctions on Putin's mafia members.
Alisher Usmanov's sister was delisted by the EU 7 months after this call.
FULL STORY – Kremlin hotline: Hungary colluded with Russia to delist sanctioned oligarchs, companies and bankshttps://t.co/QLNxZ3176e pic.twitter.com/2GX9LvS1wN

— Igor Sushko (@igorsushko) March 31, 2026

Сијарто му одговора без многу двоумење дека заедно со Словаците ќе поднесе предлог до ЕУ да ја отстрани од листата и додава: „Ќе направиме сѐ што можеме за да ја отстраниме“. Потоа Лавров му се заблагодарува за неговата „поддршка и борба за еднаквост во сите области“. Седум месеци подоцна, Исмаилова навистина беше отстранета од листата на ЕУ, објаснуваат новинарите. Кога завршиле со ова, Сијарто и Лавров го продолжиле разговорот со речиси пријателски тон и заедно се потсмевале на Европската Унија, особено на оние членки кои силно ја поддржуваат Украина. Лавров го нарекува тогашниот шеф на европската дипломатија, Жозеп Борел, свое „најголемо разочарување“, а Сијарто го опишува како „европскиот Бајден“. Во исто време, Лавров цинично коментира за европските правила и политиката на идентитет, додека Сијарто послушно му ги објаснува бирократските протоколи во Брисел. Кон крајот на разговорот, унгарскиот министер се обидува да му се додвори на својот руски колега. Тој го фали новото седиште на „Газпром“, кое го посетил во Русија, и вели: „Секогаш сум ви на располагање“.

Еден висок европски разузнавачки службеник, на кого му беа прикажани транскриптите, рече дека секој професионалец веднаш би препознал таков разговор како комуникација на оперативец со неговиот извор.

Порталот „Инсајдер“, кој ги објави транскриптите во соработка со „ВСквер“, наведува дека овие разговори за првпат го документираат целосниот степен на блискост помеѓу Сијарт и Лавров. Освен што го прави тоа што се бара од него, Сијарто исто така, рутински му ги раскажува на Лавров деталите од состаноците на европските министри за надворешни работи.

Така, во истиот разговор, тој му го пренесува на Лавров она што било кажано претходниот ден на состанокот на Советот за надворешни работи на ЕУ, заедно со расправијата со тогашниот литвански министер Габриелиус Ландсбергис. Кога бил контактиран од новинарите, Ландсбергис ги потврдил деталите од разговорот и рекол дека се чини дека цело време Путин имал „крт“ на сите официјални состаноци на ЕУ и НАТО. Според него, ако Европа сака да го зачува интегритетот на тие состаноци, Унгарија треба да биде исклучена од нив. Тој исто така додаде дека „секоја генерација има свој Ким Филби“ и дека Скијато ја игра таа улога „со ентузијазам“.

„Инсајдер“ пишува дека Унгарија и Словачка редовно го уценувале Брисел со блокада на продолжувањето на целиот пакет санкции за да симнат од листата одредени руски имиња. Дипломатите велат дека Будимпешта и Братислава често ги почнувале преговорите со долг список на Руси што сакале да ги спасат, а потоа го стеснувале на неколку политички важни луѓе. Меѓу нив биле Вичеслав Моше Кантор, Михаил Дегтјарев, Никита Мазепин, мајката на Евгениј Пригожин, па дури и патријархот Кирил. Моќен сојузник надвор од ЕУ, исто така, помогнал во таа операција. На почетокот на март, турскиот претседател Реџеп Таип Ердоган испратил писмо до словачкиот премиер Роберт Фиц нарекувајќи го Усманов „драг пријател“ и опишувајќи го како транспарентен и добронамерен човек. Инсајдер наведува дека Словачка била таа што формално поднела писмо со кое барала отстранување на Усманов.