Откриена е можна причина за хантавирусот на крузерот: Донесен е од двојка набљудувачи на птици?

Смртоносен вирус кој го пренесуваат глодари, а од кој починаа три лица на крузерот MV Hondius, можеби е донесен на бродот од холандска двојка која пред да се качи на бродот била на депонија во аргентинскиот град Ушуаја, каде што фотографирале птици и можеби стапиле во контакт со заразени глодари.

Повеќе од 20 британски патници ќе бидат вратени дома, но тие ќе се соочат со карантин што може да трае до осум недели, што е максималниот период на инкубација за болеста, пишува „Дејли меил“.

Бродот треба да се закотви на Канарските Острови откако шпанската влада нареди патниците и екипажот да добијат медицински третман, и покрај противењето на локалните власти кои стравуваат дека инфекцијата може да се прошири.

Во меѓувреме, болеста се прошири и во Швајцарија, каде што еден патник развил симптоми по враќањето дома и е во изолација.

Појавата на оваа ретка болест, со стапка на смртност од околу 40 проценти, предизвика меѓународна загриженост, но Светската здравствена организација вели дека ситуацијата не е споредлива со почетокот на пандемијата на Ковид.

Тројца пациенти – Британец, Холанѓанец и Германец – се евакуирани од бродот, додека преостанатите патници се во изолација. Тестовите потврдија дека сојот на хантавирус е сојот од Андите, единствениот за кој се знае дека се пренесува меѓу луѓето.

Здравствените власти соопштија дека ризикот за пошироката јавност е низок, додека патниците остануваат под строг надзор.