Општина Кавадарци воведе дигитален асистент

Свесна за динамиката на современото време, Општина Кавадарци продолжува со дигиталната трансформација на своите услуги.

Од денеска, на официјалната веб-страница на Општината е достапен нов дигитален асистент базиран на вештачката интелигенција, создаден за да ја олесни комуникацијата меѓу општината и граѓаните.

– Овој сервис овозможува брз и едноставен пристап до информации поврзани со административните постапки, општинските услуги, проектите и тековните активности, без чекање и без временско ограничување. Со воведувањето на дигиталниот асистент, Општина Кавадарци прави уште еден чекор кон помодерна, потранспарентна и поефикасна локална самоуправа, достапна за своите граѓани во секое време – велат од локалната самоуправа.

Оттаму додаваат дека овој AИ-сервис е резултат на успешната соработка помеѓу ИТ-одделението на Општина Кавадарци и компанијата „Тивиус “, со која е склучен донаторски договор за развој и имплементација на оваа современа алатка.

– Продолжуваме да инвестираме во дигитални решенија што го подобруваат квалитетот на услугите и придонесуваат за создавање модерна европска општина по мера на сите граѓани – потенцираат од Општината.