Новиот папа го очекуваат многу проблеми

Кој и да биде избран за нов врховен водач на 1,4 милијарди католици во светот, ќе мора да се соочи со низа проблеми, објави Хина, повикувајќи се на анализа на Ројтерс.

Меѓу нив се растечките проблеми со финансиите на Ватикан, намалувањето на посетеноста на црквите во многу западни земји и доктринарните дебати за прашања како што се ракополагањето на жените и вклучувањето на ЛГБТК католиците, што алудира на нови поделби.

Финансиската криза во Ватикан беше меѓу најновите што му зададоа главоболка на папата Франциск. Три дена пред неговата последна хоспитализација во февруари, тој нареди создавање нова комисија на високо ниво за поттикнување на донации за Ватикан, кој се соочува со буџетски дефицит и растечки дефицит во пензискиот фонд.

Иако Ватикан не објави целосен извештај за буџетот од 2022 година, најновиот извештај од средината на 2024 година вклучуваше дефицит од 83 милиони евра, изјавија за Ројтерс два извори запознаени со прашањето.

Ватикан го процени дефицитот на пензискиот фонд на речиси 631 милион евра во 2022 година. Оттогаш не се објавени нови официјални информации, но неколку информирани извори за Ројтерс изјавија дека веруваат дека дефицитот е многу поголем.

Језуитскиот свештеник Томас Риз, коментатор кој пишувал за финансиите на Ватикан, рече дека буџетските проблеми би можеле да имаат „големо влијание“ врз тоа кој ќе биде избран за нов папа на конклавата што започнува на 7 мај.

„Ќе мора да изберат некој што носи пари“, рече Риз.

Ако кардиналите бараат некој што знае каде да ги намали трошоците во сложената бирократска структура на Ватикан, тие би можеле да се одлучат за италијанскиот кардинал Пјетро Паролин. Водечки кандидат за нов папа, тој беше втор по команда на Ватикан за време на речиси целиот понтификат на Франциск.

Но, Паролин го раководеше Државниот секретаријат на Светата столица кога беше вмешан во скандал околу сомнителна инвестиција од повеќе од 200 милиони американски долари во купување зграда во Лондон.

Кардиналот Анџело Бечу, некогаш еден од најдобрите помошници на Паролин, подоцна беше осуден на суд во Ватикан за проневера и измама, за што доби пет и пол години затвор. Бечу ги негира сите обвиненија и е на слобода додека не се реши неговата жалба.

Пад на популарноста во Европа

Католичката црква многу малку го зголеми бројот на верници во светот во последниве години. Според најновите официјални статистички податоци, на крајот од 2023 година, во светот имало 1,405 милијарди католици, што е за 1,15 проценти повеќе отколку на крајот од 2022 година, кога имало 1,389 милијарди.

Најголем број католици се наоѓаат во Северна и Јужна Америка – 64,2 проценти од населението се католици. Потоа следуваат Европа со 39,6 проценти и Океанија со 25,9 проценти.