Од Град Скопје информираат дека, периодов, активно работат на целосна реконструкција на овој парк. Притоа додаваат дека градежните активности опфаќаат замена на постојните подни плочки и пешачки патеки со мермерни, кои ќе му дадат поубав и поблагороден изглед на просторот, во согласност со неговото значење и неговата местоположба
Изненадувачки изгледа тоа што ги нема клупите и другата опрема во паркот „Жена борец“ во строгиот центар на градот. Одеднаш ги снема. На прашањето што се случува и зошто ги нема клупите, од Град Скопје информираат дека, периодов, активно работат на целосна реконструкција на овој парк.
Притоа додаваат дека градежните активности опфаќаат замена на постојните подни плочки и пешачки патеки со мермерни, кои ќе му дадат поубав и поблагороден изглед на просторот, во согласност со неговото значење и со неговата местоположба.
– Истовремено, се реставрира постојната урбана опрема, ќе се постават нови канти за отпадоци, а со дополнително хортикултурно уредување ќе се збогати зелената слика на паркот. Клупите, како дел од урбаната опрема, ќе бидат зачувани при реконструкцијата и ќе бидат реставрирани дрвените елементи, по што ќе бидат вратени на локациите во паркот „Жена борец“ за зачувување на автентичноста на овој парк во срцето на Скопје каде што зеленилото, спомените и историјата се среќаваат – објаснуваат градските власти.
Тие велат дека овие активности се реализираат како дел од поширокиот процес инициран од градоначалникот Орце Ѓорѓиевски за враќање во функција на симболите на главниот град и враќање на сјајот на централното градско подрачје по долгогодишна запуштеност и негрижа – велат градските власти.
Според нив, целта е строгиот центар на Скопје повторно да го добие својот препознатлив изглед и сјај, по примерот на европските и светските метрополи.
– Во изминатиот период, повторно беа пуштени во употреба фонтаните „Лотосов цвет“, „Воин на коњ“, „Филип II Македонски“, „Олимпија“, „Паднати борци“, како и фонтаната на плоштадот „ВМРО“. Повторно беше активиран и Вечниот оган, кој во минатото не беше во функција, а наскоро и подната фонтана на плоштадот „Македонија“ повторно ќе биде ставена во функција – одлучни се од Град Скопје.
(А. П.) Фото: (Ѕ. П.)
ИЗДВОЕНИ
Случајот со врсничкото насилство што го откри ВЕЧЕР доби судска разрешница : Четирите малолетнички од Ѓорче Петров упатени во воспитно-поправен дом
Компаниите ќе можат да исплаќаат плати и придонеси од сметките на „Алта банка“
Екс членот на ДИК, Субхи Јакупи, познат по бонусите што си ги поделил со колеги за избори, стана претседател на Управниот суд
Мицкоски ветува нов сопственик, Филипче предупредува за ризиците, се отвори темата за наводните врски на ДУИ со Алта банка Србија
