Насадени 6.000 дабови садници на Маркови Кули

Беше реализирана голема акција за пошумување на локалитетот Маркови Кули во Прилеп, каде што во рамките на проект финансиран од Бирото за регионален развој беа насадени вкупно 6.000 дабови садници.

Акцијата се одржа по повод одбележувањето на Денот на пролетта и претставува дел од пошироките напори за заштита и унапредување на природното наследство.

Пошумувањето беше спроведено на дел од теренот над новите градски гробишта, на патот кон Трескавец, при што изборот на садниците беше направен согласно со стручните прописи за зачувување на овој заштитен локалитет.

Градоначалникот на Општина Прилеп, Дејан Проданоски, истакна дека ваквите активности треба да станат традиција и начин на одбележување на пролетта.

– Видот на садниците беше определен согласно со прописите од Институтот за старословенска култура, кој се грижи за изгледот и заштитата на овој споменик на природата. Сметам дека ова е начинот на кој треба да го одбележуваме Денот на пролетта, а ваквите акции да станат уште почести – изјави Проданоски.

Заменик-директорот на ЈП „Македонски шуми“, Кире Михаилов, ја поздрави иницијативата, нагласувајќи дека особено радува вклученоста на младите.

– Навистина ми е мило што гледам голема ангажираност, особено кај најмладите, кои дадоа придонес заедно со своите родители. Ова треба да биде пример за цела Македонија – рече Михаилов.

Проектниот координатор Гоце Бојкоски упати апел до граѓаните за поголема вклученост во вакви акции во иднина, посочувајќи дека Општина Прилеп и ЈКП „Комуналец“ ќе обезбедат логистичка и техничка поддршка.

Покрај садниците, Општината обезбеди и опрема за идни еколошки активности, меѓу кои трактор, 25 дупчалки за садење и околу 100 парчиња друг алат, која ќе им биде достапна на сите граѓани и волонтери.

Во акцијата учествуваа претставници на локалната самоуправа, јавните претпријатија, училиштата, државните институции, ЈП „Македонски шуми“, ЈКП „Комуналец“ – Прилеп, како и бројни граѓани и здруженија.

Од Општина Прилеп изразија благодарност до сите учесници, потенцирајќи дека ваквите иницијативи ја зајакнуваат заедничката грижа за природата и придонесуваат за одржлив развој на животната средина.