Градоначалникот на Москва, Сергеј Собјанин, соопшти дека Украина во текот на ноќта ја нападнала московската област со приближно 650 беспилотни летала.
Според Собјанин, кој ја сподели оваа информација на Телеграм, противвоздушната одбрана соборила поголем дел од летечките објекти на голема оддалеченост. Тој наведе дека 105 беспилотни летала биле уништени додека се приближувале кон руската престолнина.
Првично немаше извештаи за материјална штета или повредени лица. Информациите објавени од московските власти не можеа независно да се потврдат.
Доколку руските податоци за бројот на соборени беспилотни летала се точни, тоа би претставувало еден од најголемите украински напади.
Повикувајќи се на сведоци, весникот „Киев индепендент“ (Kyiv Independent) објави дека цел на нападот бил објект за производство на нафта лоциран на околу 40 километри од Москва.
Украина постојано ја напаѓа руската нафтена индустрија во обид да му наштети на енергетскиот сектор, чии приходи служат како клучен извор на финансирање за руските воени напори.
Со поддршка од западните сојузници, Украина се брани од руската инвазија од големи размери повеќе од четири и пол години и редовно изведува напади врз цели длабоко во руската територија како дел од своите одбранбени операции.
Од друга страна, Русија систематски напаѓа цели низ Украина користејќи беспилотни летала и ракети, што резултира со цивилни жртви и големи штети на станбени згради и критична инфраструктура. Властите соопштија дека најмалку шест лица загинале вчера во источноукраинскиот град Харков при руски напад со авионски бомби.
Истражителите известуваат дека се повредени 59 лица, додека спасувачките екипи продолжуваат со пребарување на урнатините на станбена зграда во потрага по евентуални дополнителни жртви, пренесува ДПА.
