Македонска берза АД Скопје ја започна иницијативата „Август – месец на подготовки за пазарот на капитал“, наменета за домашните компании кои бараат нови начини за финансирање на растот и развојот.
Во рамки на иницијативата е изготвен „Водич за трансформација и раст на бизнисите“, кој на едноставен начин ги објаснува можностите што ги нуди пазарот на капитал – од издавање акции и корпоративни обврзници до подготовка за котација на берза и подобрување на корпоративното управување.
Водичот е наменет за сопственици и менаџери на компании кои планираат нов инвестициски циклус, проширување на бизнисот или обезбедување долгорочен капитал.
Покрај тоа, во текот на август Берзата организира и бесплатни индивидуални консултации за компаниите заинтересирани за пазарно финансирање, вклучително и преку проектот за подготовка на македонски компании за пристап до капитал, кој се реализира со поддршка на Европската банка за обнова и развој (ЕБОР).
Од Берзата посочуваат дека целта е компаниите подобро да ги искористат можностите што ги нуди пазарот на капитал како инструмент за развој и зголемување на конкурентноста.
