Саудиска Арабија ги намали испораките на нафта кон Европа откако напади со беспилотни летала оштетија клучен извозен цевковод кон Црвеното Море, објави „Ројтерс“, повикувајќи се на извори од трговијата и транспортот на нафта.
Нападите, за кои Саудиска Арабија ги обвини ирачките милиции, во петокот го принудија Кралството да го затвори цевководот „Исток-Запад“, кој во изминатите шест месеци имаше важна улога во извозот на саудиска нафта кон Црвеното Море, заобиколувајќи го Ормускиот Теснец.
Саудиска Арабија ги известила европските купувачи дека дел од пратките планирани за товарење во септември ќе бидат откажани, а товарењето во пристаништето Јанбу е прекинато. „Сауди Арамко“ не го коментираше случајот.
Поради прекинот, Саудиска Арабија би можела да се обиде да зголеми дел од извозот преку Ормускиот Теснец со таканаречени „темни испораки“, какви што веќе користат Обединетите Арапски Емирати и Ирак. Според трговски извори, на овој начин производителите од Заливот извезуваат меѓу 7 и 9 милиони барели дневно, односно 30 до 40 отсто од предвоените количини.
Намаленото снабдување ги зголеми цените. Фјучерсите на „Брент“ се тргуваа близу 108 долари за барел, додека физичкиот европски пазар беше уште поскап – реперот „Dated Brent“ достигна околу 122 долари, според LSEG.
Податоците на Vortexa покажуваат дека од 7 до 13 септември Саудиска Арабија натоварила 22 милиони барели на 12 танкери на терминалите Рас Танура и Џуаимах, повеќе од шесте до седум танкери неделно во претходните три недели.
Меѓу најпогодените купувачи е полскиот нафтен гигант „Орлен“, кој итно бара сурова нафта од Северното Море и други региони за да го надомести прекинатиот увоз од Саудиска Арабија. „Арамко“ од 2022 година е главен снабдувач на „Орлен“ и обезбедува околу 40 отсто од нејзината нафта, со што Полска ја намали зависноста од руската нафта, но истовремено ја зголеми зависноста од саудискиот производител.
Од „Орлен“ не ги коментираа конкретните комерцијални трансакции, но соопштија дека активно управуваат со набавките за да обезбедат непречено работење на рафинериите.
