Иран тврди дека сè уште ја контролира ситуацијата во Ормускиот Теснец

Иран и Оман преговараат за привремен договор за управување со поморскиот сообраќај низ теснецот.

Иран ја задржува иницијативата во Ормускиот Теснец, и покрај тврдењата на САД во врска со непречениот проток на нафта низ тој стратешки воден пат, изјави бригадниот генерал Аболфазл Шекарчи, портпарол на иранските вооружени сили.

Шекарчи ги отфрли како „лажни и смешни“ тврдењата на командантот на Централната команда на САД (CENTCOM), адмиралот Бред Купер – кој изјави дека американските сили го олесниле транспортот на повеќе од една милијарда барели нафта низ Ормускиот Теснец и заштитиле повеќе од 2.000 трговски бродови во изминатите два месеца – пренесува „Прес ТВ“ (Press TV).

Тој ги окарактеризира изјавите на американскиот командант како неуспешна психолошка операција, а не како одраз на реалната ситуација, истакнувајќи дека нивната цел била да се подигне моралот на американските сили во регионот и да се оправдаат значителните финансиски и човечки трошоци што ги имаат САД.

„Иницијативата во Ормускиот Теснец останува во рацете на моќните ирански вооружени сили“, рече Шекарчи, додавајќи дека таквите тврдења нема да ја променат реалноста – како што се изрази тој – за американското воено повлекување од регионот.

Купер на платформата „Икс“ изјави дека американските сили го олесниле минувањето на повеќе од една милијарда барели нафта низ Ормускиот Теснец и заштитиле над 2.000 комерцијални бродови во последните два месеца, пренесува „Танјуг“.

Тој додаде дека клучните пловни патишта биле исчистени од мини, овозможувајќи минување на илјадници бродови. Иран и Оман преговараат за привремен договор за управување со поморскиот сообраќај низ Ормускиот Теснец, по пропаѓањето во јуни на меморандумот за разбирање меѓу Вашингтон и Техеран, чија цел беше ставање крај на војната што започна во февруари.