Јавното претпријатие „Комунална хигиена“ ги информира граѓаните дека продолжува да им ја нуди можноста без плаќање паричен надоместок, да го „одложат“ својот кабаст отпад, во кој спаѓаат стариот мебел, електронските и електричните апарати, во Центарот за селекција на отпад во Карпош, секој ден во неделата, во терминот од 7:00 до 19:00 часот.
– Доколку имаат потреба ЈП „Комунална хигиена“ со специјални комунални возила да го преземе и транспортира кабастиот отпад од нивните домови, граѓаните можат да ја закажат оваа услуга од понеделник до петок, во периодот од 7:00 до 15:00 часот, на телефонските броеви 0800 222 33 и 3216644 – потенцираат од претпријатието.
Оттаму уште еднаш потсетуваат дека секое фрлање отпад на јавни и на сообраќајни површини претставува прекршување на Законот за јавна чистота и подлежи на санкции, а ваквото несовесно однесување, како што велат, може да резултира со исклучително штетни последици за животната околина и за јавното здравје.
