Голема промена за патниците: Барселона ја дуплира туристичката такса

Туристите кои престојуваат во Барселона ќе мора да плаќаат двојно поголема такса од април, која во некои случаи ќе изнесува 15 евра по ноќ, а властите планираат да ги искористат новите приходи за решавање на станбената криза во градот.

За гостите на хотелите, таксата ќе се движи од 10 до 15 евра по ноќ, во зависност од категоријата на сместување, додека оние што изнајмуваат станови или викендички ќе плаќаат до 12,5 евра по ноќ, што е двојно повеќе од претходните 6,25 евра.

Патниците на крузери што ја посетуваат Барселона, како и досега, ќе плаќаат шест евра по лице, објавува „Скај њуз“. Властите во Каталонија сакаат да го намалат бројот на посетители и да го направат домувањето подостапно за локалното население со зголемување на данокот.

Закупците со години истакнуваат дека прекумерниот број туристи и растот на бројот на краткорочни изнајмувања доведуваат до пораст на цените на недвижностите во градот.

Според законот со кој се воведува новата такса, една четвртина од приходите од таксата ќе бидат инвестирани во станбени прашања во Барселона.

Раководството на Барселона, исто така, објави планови за целосно елиминирање на краткорочното изнајмување сместување до 2028 година, како дел од пошироката стратегија за контрола на туризмот и зачувување на квалитетот на животот на локалните жители, пренесува Танјуг.