По разочарувачкиот старт на сезоната, во тимот на Ферари конечно гледаат причина за оптимизам. Тие веруваат дека следните неколку недели би можеле да бидат пресвртница во нивната борба за враќање на победничките патеки.

Големата награда на Монако се смета за идеална можност болидот SF-26 да го покаже својот вистински потенцијал. На легендарната улична патека, моќноста на моторот има помало значење, додека шасијата, аеродинамиката и механичкото прилепување се клучни фактори.

Дополнителна надеж за италијанскиот тим носи и одлуката на ФИА да ја ограничи употребата на флексибилна аеродинамика, што според проценките би можело да му одговара на концептот на болидот на Ферари.

Посебен мотив ќе има и Шарл Леклер, кој минатата година конечно славеше на домашната трка во Монако и сега сака повторно да го предводи тимот кон врвот.

Сепак, најголемите очекувања се поврзани со можната примена на системот ADUO, механизам кој им овозможува дополнителен развој на погонските единици на производителите што заостануваат зад конкуренцијата.

Според информациите од падокот, моторот на Мерцедес моментално располага со околу 25 коњски сили повеќе од оној на Ферари. Во Маранело веруваат дека новите надградби би можеле значително да ја намалат оваа разлика.

Првиот пакет подобрувања се очекува за Големата награда на Австрија, додека вториот би пристигнал по летната пауза.

Интересно е што и возачот на Мерцедес, Кими Антонели, смета дека главниот проблем на Ферари не е шасијата.

  • Ако ја подобрат погонската единица, ќе бидат многу поблиску до врвот, бидејќи веќе имаат одлична основа, изјави младиот Италијанец.

Иако Ферари во моментов заостанува зад Мерцедес во генералниот пласман, во Маранело веруваат дека шампионатот сè уште не е загубен. Затоа сите погледи се вперени кон претстојните одлуки на ФИА и пакетот надградби кој би можел да означи почеток на долгоочекуваното враќање на Скудерија во борбата за победи.

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ