Европа испраќа јасна порака до Трамп: „Не нѐ уценувајте!“

Пораката на Европа до американскиот претседател Доналд Трамп во понеделник беше јасна: Нема да ви помогнеме да го обезбедите Ормутскиот теснец.

Министрите за надворешни работи од 27-те земји-членки на ЕУ се собраа во Брисел за да разговараат за повикот на американскиот претседател до европските земји да помогнат во обезбедувањето на тесниот воден пат, витален канал за испорака на нафта што Иран во голема мера го блокираше како одмазда за воздушните напади на САД и Израел.

Меѓу идеите што се изнесени беше проширувањето на мандатот на поморската мисија на ЕУ, Аспидес, за да им се дозволи на европските воени бродови да патролираат низ теснецот помеѓу Персискиот Залив и Оманскиот Залив. Но, по часови разговори зад затворени врати за војната во Иран, министрите јасно ставија до знаење дека го гледаат тоа како проблем што Америка треба да го реши, објави Политико.

„Европа нема интерес за бесконечна војна“, изјави главната дипломатка на ЕУ, Каја Калас, по состанокот во понеделник вечерта. „Ова не е европска војна, но европските интереси се директно доведени во прашање“, рече таа.

Иако меѓу министрите постоеше „јасна желба“ за „зајакнување“ на поморската мисија на ЕУ на Блискиот Исток, „немаше интерес за промена на мандатот“, рече Калас, осврнувајќи се на испраќање воени бродови во теснецот.

„Проширувањето на овој мандат до Ормутскиот теснец… немаше интерес од земјите-членки за тоа. Никој не сака активно да учествува во оваа војна“, повтори таа.

Трамп изјави за „Фајненшл тајмс“ за време на викендот дека ќе биде „многу лошо за иднината на НАТО“ ако европските земји не одговорат на неговиот повик за помош. Тој напиша на социјалните мрежи дека е во контакт со седум земји за обезбедување на теснецот, без да ги именува на кои земји мисли.

Во понеделник, Трамп им рече на новинарите дека е уверен дека Франција ќе им помогне на Соединетите Американски Држави. „Мислам дека ќе помогнат. Мислам, ќе ви кажам, разговарав со него вчера“, рече американскиот претседател, осврнувајќи се на неговиот француски колега Емануел Макрон. Трамп, исто така, рече дека „не е задоволен“ од одговорот на Велика Британија и дека е „многу изненаден“ откако премиерот Кир Стармер изјави дека нема да биде вовлечен во „поширока војна“ околу Иран.

Трамп инсистираше дека „не ни треба никој“ и дека сме „најсилната нација во светот“, но неговото барање за помош беше тест за солидарност, за да се види како ќе реагираат европските земји, бидејќи затворањето на теснецот од страна на Иран ги зголеми цените на нафтата.