Францускиот претседател Емануел Макрон ја повика Европската комисија привремено да ги намали стандардите за квалитет на ЕУ за дизелот и керозинот, додека Франција се соочува со рекордни цени и сè поголем недостиг на гориво, објави телевизијата BFM TV.
Намалените стандарди би можеле да им овозможат на одредени рафинерии да го зголемат производството за 5 до 20 проценти, но цената за тоа би можела да биде гориво што повеќе ја загадува животната средина.
Иницијативата на Макрон доаѓа во момент кога конфликтот на САД и Израел со Иран ги нарушува протоците низ Ормутскиот Теснец, вршејќи притисок врз енергетските пазари кои се веќе нарушени откако ЕУ, по ескалацијата на конфликтот во Украина во 2022 година, драстично го намали увозот од Русија.
Во писмото упатено до претседателката на Европската комисија, Урсула фон дер Лајен минатата недела, Макрон побара привремено намалување на стандардите за квалитет на горивото кои се однесуваат на густината, испарливоста и содржината на сулфур, се наведува во извештајот објавен во понеделникот. Тој наведе дека овој потег би можел да донесе „значително зголемување на производството“ од 5 до 20 проценти, во зависност од рафинеријата.
Макрон истакна дека американскиот дизел за патниот сообраќај може да содржи до 15 честички на милион (ppm) сулфур, додека границата во ЕУ изнесува 10 ppm. Дозволувањето поголема содржина на сулфур би им овозможило на рафинериите брзо да го зголемат производството на гориво во момент кога ЕУ се бори со недостиг и вртоглав раст на цените, но по цена на поголемо загадување.
Францускиот претседател исто така сака дизелот од типот B7 (кој содржи до 7 проценти биодизел) во поголема мера да се замени со дизел од типот B10 (кој содржи до 10 проценти биодизел). Тој тврдеше дека овие мерки „краткорочно би ги засилиле увозните и производствените капацитети“ и би ја зголемиле количината на гориво достапна на европскиот пазар.
Париз го побара ова бидејќи Франција се соочува со нагол раст на цените и тешкотии во снабдувањето. Според писмото на Макрон, дистрибутерите на гориво пријавуваат сè поголеми проблеми во обезбедувањето испораки за следните недели. Европа во голема мера зависи од Блискиот Исток кога станува збор за преработени горива, кои чинат 36 проценти од нејзиниот увоз на керозин и 18 проценти од увозот на дизел.
Цените на дизелот во Франција минатата недела достигнаа рекордни 2,39 евра по литар, додека во понеделникот 16 проценти од бензинските пумпи имале недостиг од барем еден вид гориво, според податоците на владата. Франција троши околу 600.000 барели дизел дневно, а увезува приближно половина од таа количина, изјави Макрон. Цените на горивата ширум ЕУ исто така достигнаа рекордни вредности, при што просечната цена на дизелот овој месец изнесуваше 2,16 евра по литар, а на бензинот 2,06 евра.
Светските цени на нафтата пораснаа над 100 долари по барел бидејќи војната на САД и Израел против Иран, како и нападите на Хутите врз саудиската енергетска инфраструктура, подгреваат стравувања од нови нарушувања во снабдувањето. Цената на нафтата од типот „Брент“ неодамна ја надмина таа граница, за првпат по речиси два месеца.
