Ел Нињо се врати: Како екстремно високите температури ќе предизвикаат инфлација и нагло зголемување на цените на храната?

Враќањето на климатскиот феномен Ел Нињо носи екстремно високи температури низ целиот свет, а последиците веќе се чувствуваат. Тоа е феномен поврзан со невообичаено топли морски површини во централниот и источниот тропски Тихи Океан. Гореспоменатото затоплување ги менува ветровите и моделите на врнежи и може да влијае на времето во големи делови од светот.

Покрај екстремната топлина, некои региони очекуваат обилни врнежи од дожд поради Ел Нињо, додека други се загрозени од невидени суши. Таквото време директно влијае на земјоделското производство, од американскиот Среден Запад до оризовите полиња во Југоисточна Азија, што има сериозни последици за глобалната економија.

Агенцијата Ројтерс наведува дека условите што ги носи Ел Нињо веројатно ќе ја поттикнат инфлацијата во земјите во развој со нарушување на нормалните модели на врнежи од дожд. На пример, во Азија се очекува значително помалку дожд од просекот, што би можело да создаде големи проблеми во земји како Индија и Виетнам.

Индискиот метеоролошки оддел предвидува најсушен период во последната деценија, што ја загрозува овогодишната жетва на ориз. Пониските приноси ќе ја намалат понудата на пазарот, што значи повисоки цени на храната за милиони луѓе.

Поради зголемувањето на цените, банките би можеле да бидат принудени да ги одржуваат каматните стапки високи.

„Очекуваме каматните стапки да се зголемат во втората половина од годината, особено во земјите од Јужна Азија кои се најизложени на Ел Нињо, како што се Индија, Индонезија, Виетнам и Тајланд. Ел Нињо само ќе ја направи инфлацијата уште потврдоглава“, изјави за Ројтерс Гари Тан, менаџер во „Олспринг Глобал Инвестментс“.

Ројтерс предупредува дека слично сценарио е можно низ цела Африка. Земјоделските сектори во земји како Кенија се многу ранливи на временските нарушувања, поради што постои и ризик од економски кризи таму.