Чистка во американската армија во ек на војната: Смената на генерали отвори сериозни прашања за последиците и идната стратегија

Отстранувањето на началникот на Генералштабот на американската армија, генерал Ренди Џорџ, и генерал Дејвид Ходн, ги изненади воените лидери и предизвика длабока загриженост кај одбранбените претставници. Се поставуваат прашања за последиците од оваа одлука врз војната во Иран, како и за долгорочниот план за воведување нови технологии и тактики во војската, објавува „Аксиос“.

Ненадејното отстранување на двајцата генерали
Џорџ и Ходн се најновите во низата генерали и високи офицери што ги отстрани министерот за одбрана, Пит Хегсет. Ненадејните заминувања го преобликуваа врвниот состав на Здружените началници на генералштабови, разузнавачките агенции и клучните борбени команди.

Се вели дека отстранувањето на Џорџ е резултат на судир на карактери, а не на несогласување околу стратешката насока на армијата, според двајца американски претставници. Еден од нив, чистката среде војна ја опиша како „лудило“.

Генералот Ходн беше назначен кон крајот на минатата година да раководи со новосоздадената Команда за трансформација и обука (T2COM), која беше дизајнирана да го забрза развојот и распоредувањето на нови технологии. Организацијата произлезе од Иницијативата за трансформација на армијата, која Џорџ помогна да се води. „Ова не изгледа како особено силна или самоуверена одлука“, рече еден функционер за потегот на Хегсет.

Одлука во екот на конфликтот
Трансферите доаѓаат во чувствително време, со делови од елитната 82-ра воздушно-десантна дивизија на армијата распоредени на Блискиот Исток. Армијата е исто така одговорна за интегрирана воздушна и ракетна одбрана во регионот.

„Значи, имате генерал со четири ѕвездички кој активно работи на доставување опрема и луѓе на бојното поле – за да ги заштити американските сили – и го отстранувате? Во ек на војна?“, изјави трет американски функционер за Axios.

Зборувајќи за Axios на 20 март, генералот Џорџ нагласи дека војната во Иран ја истакнува потребата од зголемување на домашното производство на оружје. „Сè е во тоа како можеме да ги направиме овие работи побрзи“, рече тој. „И тоа важи за сè – не само за пресретнувачите. Секоја ракета. Сè што правиме.“

Неизвесност за наследникот
Позицијата на Џорџ како вршител на должноста началник ја зазема генералот Кристофер ЛаНев. Тој претходно беше помошник на Хегсет, а неодамна беше именуван за заменик-началник на Генералштабот на Армијата, позиција испразнета по ненадејното пензионирање на генералот Џејмс Мингус.

Според еден американски функционер, ЛаНев претходно изразил сомнежи дека Армијата се движи „пребрзо и предалеку“ со реформите. Судбината на T2COM, која беше основана пред само неколку месеци, е нејасна. Фотографијата на генералот Ходн како командант сè уште беше на официјалната веб-страница во петокот наутро.