Битка за 1,7 милијарди барели нафта!

Велика Британија најави дека цврсто ќе ги брани своите интереси и интересите на жителите на Фолкландските Острови пред Меѓународниот трибунал за правото на морето (ITLOS), кој во вторник треба да го разгледа барањето на Аргентина во врска со нафтениот проект „Си лајон“.

Аргентина ја покрена постапката за овој проект – кој се наоѓа северно од островите и во кој се вклучени британски и израелски компании – врз основа на проценки дека наоѓалиштето содржи 1,7 милијарди барели нафта, пренесува dpa.

Трибуналот со седиште во Хамбург, основан според Конвенцијата на Обединетите нации за правото на морето, има овластување да донесува правно обврзувачки одлуки во поморските спорови. Се очекува расправата да трае два дена.

Портпарол на британскиот премиер во понеделникот изјави дека Лондон ќе го изнесе својот став во врска со барањето на Аргентина за воведување привремени мерки, нагласувајќи дека постапката не се однесува на суверенитетот над Фолкландските Острови.

„Ќе продолжиме цврсто да ги браниме нашите интереси и интересите на народот на Фолкландските Острови“, рече портпаролот.

Тој додаде дека британската влада го отфрла толкувањето на Аргентина за ситуацијата, истакнувајќи дека жителите на островите имаат право да ги развиваат сопствените природни ресурси.

„Самото покренување на постапка не значи дека законитите економски активности мора да престанат“, изјави тој.

Аргентинскиот претседател Хавиер Милеи претходно ги окарактеризира активностите на компаниите вклучени во истражувањето на нафта околу островите како незаконски и воведе економски санкции за поединци и фирми кои учествуваат во нив. Британскиот премиер Енди Бернам претходно оваа година, пред Генералното собрание на ОН, изјави дека неговата земја одлучно ќе одговори на заканите против суверенитетот на Фолкландските Острови и ќе го брани правото на нивните жители на самоопределување и на останување под британски суверенитет.

Фолкландските Острови – од Аргентина нарекувани Малвински Острови – долго време се предмет на спор меѓу двете земји. Британија и Аргентина водеа војна во 1982 година, откако аргентинските сили ги зазедоа островите.