Атмосферска „омега“ над Европа, на Балканот ќе донесе ред сонце, па ветер, но и снег на планините

Aнтициклон, или област со висок притисок, која се протега од Северното Море преку Данска и Германија до алпската бариера ќе има доминантно влијание врз временската состојба над европското копно во следните десет дена. Длабок циклон над Балтичкото Море го спречува антициклонот да се движи кон исток, а во исто време влече ладен воздух од поларните географски широчини над источна Европа во својата циркулација, објави хрватскиот метеорол Бојан Липовшчак.

На својот пат, студениот воздух се среќава со орографската бариера на Алпите, која го отклонува кон исток и го насочува низ познатата Виенска порта кон Панонската рамнина и кон Балканскиот регион. Над Атлантикот, покрај брегот на Ирска, има длабок, бавно движечки циклон.

Распоредот на центрите со висок и низок притисок ја поддржува таканаречената блокирачка (омега) ситуација, во која воздушните маси се движат многу бавно кон исток. Над Средоземното Море има топла и влажна воздушна маса, а областа на контакт и мешање на ладен и топол воздух се протега во правец север-југ над регионот.

Ќе доминираат ветрови од север и северозапад, како и прилив на студен воздух во бранови со променлива и зголемена облачност. Во средината на следната недела, со зголемена облачност и помал пад на температурата на воздухот, на места ќе има пообилни врнежи. Поради приливот на студен воздух од север во повисоките слоеви на атмосферата, линијата на снег ќе се спушти, па затоа постои голема веројатност за снег во планинските региони на Балканскиот Полуостров и на Алпите.

Претстојниот викенд и почетокот на следната недела ќе бидат стабилни, со подолги сончеви периоди и слаб северен ветер. Од вторник до четврток се очекува претежно облачно време со повремени врнежи од дожд и пад на температурата на воздухот.

Крајот на следната недела и продолжениот викенд за први мај носат променливо време со постепена стабилизација и разведрување. Се очекува зголемување на максималните дневни температури, но пад на ноќните температури поради ведрите ноќи и приливот на ладен воздух од север. Заедно со променлива облачност, на места ќе има краткотрајни врнежи од дожд, но времето претежно ќе биде поволно за активности на отворено.