„Антропик“ предупредува: ВИ до крајот на годинава би можела сама да се прошири на телевизорите, паметните рерни и на други уреди

Американската технолошка компанија „Антропик“, која развива вештачка интелигенција и стои зад познатиот асистент на вештачката интелигенција „Клод“, деновиве објави дека за неколку месеци помалите модели на вештачка интелигенција (ВИ) би можеле да станат способни независно да се шират на уреди поврзани на Интернет, како што се паметните рерни и поевтините андроид телевизори.

Во експериментите, компанијата провери дали може моделите на вештачка интелигенција да пронајдат уреди со безбедносни недостатоци, да се копираат себеси на нив и да продолжат да се шират без помош на луѓето. Помалите модели покажаа дека се способни да извршат многу од потребните чекори, но, сепак, се борат да го завршат целиот процес. Во поедноставените тестови, во кои беа отстранети некои безбедносни бариери, ГЛМ-5.2 и други помоќни модели беа способни независно да се копираат и да се шират на други уреди.

„Антропик“ предупредува дека би било тешко да се спречат ваквите модели на ВИ, бидејќи нема да има централно место за нивно исклучување. За разлика од класичните малициозни програми, тие би можеле самостојно да најдат начини да работат на уреди со кои не се сретнале претходно, но, исто така, да се обидат да пристапат до моќни процесори во центри за податоци.

Истражувањето опфати уреди поврзани на Интернет, како што се андроид телевизори, паметни домашни уреди и друга слична опрема, кои честопати немаат доволно добра заштита. Ако продолжат да се развиваат со сегашното темпо, наведува „Антропик“, помалите модели на вештачка интелигенција би можеле да станат способни да се копираат себеси и да се шират на други уреди до крајот на оваа година. Набргу потоа, системите што користат други модели на вештачка интелигенција би можеле да добијат слични можности.

Според „Антропик“, ваквите системи на вештачка интелигенција, веројатно, би се ширеле бавно, користејќи голем број лесно достапни и помалку заштитени уреди. Затоа компанијата предупредува дека е потребно да се подобри безбедноста на овие системи со цел да се спречи неконтролираното ширење на вештачката интелигенција.