Владата на Соединетите Американски Држави денес објави дека воведува санкции врз 35 лица и организации за нивната улога во архитектурата на сивото банкарство на Иран.
Вашингтон ги обвинува за олеснување на заобиколувањето на меѓународните санкции и финансиските текови поврзани со Техеран, објави „Ројтерс“.
Канцеларијата за контрола на странски средства (OFAC) на Министерството за финансии на САД соопшти дека санкционираните мрежи им обезбедиле на иранските вооружени сили, вклучително и на Корпусот на исламската револуционерна гарда (IRGC), пристап до меѓународниот финансиски систем.
Ова важи и за трансакциите од продажба на нафта на црниот пазар, како и за набавка на компоненти за ракетни и други воени системи.
„OFAC“ предупредува дека секоја компанија што плаќа надоместоци на иранските државни институции или на ИРГК за премин низ Ормутскиот теснец ќе се соочи со строги санкции.
Министерот за финансии на САД, Скот Бесант, оцени дека „сивата банкарска мрежа на Иран е клучна финансиска поддршка за неговите вооружени сили“, наведувајќи дека таа овозможува активности што ја дестабилизираат глобалната трговија и поттикнуваат насилство на Блискиот Исток.
Тој додаде дека нелегалните финансиски текови преку оваа мрежа ги поддржуваат, како што рече, „терористичките операции“ на иранскиот режим, претставувајќи закана за американскиот персонал, сојузниците и глобалната економија.
Бесант предупреди дека секоја институција што учествува во такви активности ќе сноси „сериозни последици“, пренесува „Танјуг“.
