Алпите се поместуваат, пукнатината се шири! Се заканува уривање на 400.000 кубни метри карпи

Дури 400.000 кубни метри карпи би можеле да се одвојат од планината Хохфогел во Алпите и да се срушат низ нејзините падини, предупредуваат научниците кои забележуваат сѐ побрзо поместување на карпестата маса. Во јуни, од планината веќе се одвоија околу 2.000 кубни метри карпи, а експертите стравуваат дека може да следува многу поголемо урнување. На врвот висок 2.592 метри, на границата меѓу Германија и австриската покраина Тирол, пукнатина постои уште од 19 век, но со текот на времето значајно се проширила. Некогаш широка отприлика колку и човечки рамена, денес на одделни места е широка неколку метри, пишува Euronews.

Научниците ја следат планината веќе 12 години, а од 2018 година користат трајно поставени сензори и мерни уреди. Повеќе од 30 сензори ги бележат поместувањата со милиметарска прецизност. Оваа пролет беа забележани поместувања од дури пет милиметри неделно, што е исклучително брзо во геолошки размери. За споредба, Алпите во просек се поместуваат околу 1,8 милиметри годишно. Особено загрижува новата пукнатина на југозападниот гребен, која истражувачите ја сметаат за критична точка. Главната пукнатина, според податоците на Техничкиот универзитет во Минхен од 2024 година, е долга околу 35 метри, широка до шест метри и длабока приближно 60 метри.

Геолозите предупредуваат и на влијанието на климатските промени. Обилните врнежи, грмежните немири и топењето на снегот го забрзуваат поместувањето на карпите, а таквите појави стануваат сѐ почести и поинтензивни. Искачувањето на Хохфогел од австриската страна е веќе подолго време затворено, додека пристапот од германската страна е сѐ уште отворен. Научниците се надеваат дека системите за рано предупредување ќе овозможат навремено затворање на опасните подрачја и спречување на несреќи. Врз основа на податоците од сензорите, тие се трудат да ги препознаат знаците што му претходат на урнувањето, иако предупредуваат дека во планинските подрачја критичните промени можат да се случат за само неколку часа или денови.