Активен пожар во скопско: ЦУК за ситуацијата со пожарите до 18 часот

На територијата на државата заклучно со 18 часот регистрирани се вкупно 14 пожари на отворен простор, соопшти Центарот за управување со кризи (ЦУК).

Според најновиот извештај, еден пожар е сѐ уште активен, четири се ставени под контрола, а девет се целосно изгаснати.

Единствениот активен пожар е во Стопански Двор, во општина Ѓорче Петров, каде што гори сува трева и грмушки.

Пожарникарите успеаја да стават под контрола четири пожари на неколку локации низ земјава.

Под контрола се пожарите во општина Кавадарци, кај селата Раец, Ќесендре и Дреново каде гореше нискостеблеста шума и ниска вегетација.

Под контрола е и пожарот во општина Крива Паланка, кај селото Мождивњак на местото викано Острец, каде што беше зафатена шума.

Исто така, под контрола се ставени и пожарите во општина Тетово кај ресторанот „Сирач“, каде гореше сува трева, како и во општина Желино, кај селото Горна Лешница, каде беше запалено ѓубре.

Од ЦУК информираат дека целосно се изгаснати девет пожари. Во општина Чучер Сандево изгаснати се пожарите кај Глуво, село Мирковци и село Кучевишка Бара, сите на сува трева и грмушки.

Во Скопје изгаснати се пожарите во општина Карпош на улица „Скупи“ кај сервисот „Агромеханика“, како и во општина Гази Баба на Скопско Поле каде гореше дрво покрај пругата.

Пожарните екипи целосно ги ликвидираа и пожарите во Битола кај Тумбе Кафе, во Прилеп на улица „Дебарска“ кај местото Теќе, во Струга кај селото Лабуништа и во општина Теарце кај селата Шемшово и Сиричино.