„Ова можеби е последен пат да го гледаме Новак овде“

Српскиот тенисер Новак Ѓоковиќ го започнува турнирот „Париз Мастерс“ од првото коло, соочувајќи се со многу тежок предизвик уште на самиот почеток. Најдобриот тенисер на сите времиња, во воведното коло на „Париз Мастерс“ ќе игра против Валентин Вашеро – турнир на кој тој има освоено рекордни седум трофеи. Директорот на турнирот, Седрик Пиолин, навестува дека ова би можело да биде последен или претпоследен пат да го гледаме на оваа сцена…

Тој ги повика навивачите да уживаат во настапите на Новак, бидејќи крајот на неговата кариера е сè поблиску…
„Мислам дека пораката е: ’Ајде да уживаме во ова максимално‘. Да уживаме во Новак колку што можеме повеќе, бидејќи ако ова не е неговиот последен настап овде, тогаш веројатно е претпоследниот. Тој е рекордер со седум титули на ’Ролекс Париз Мастерс‘ – да не ги спомнуваме неговите 24 Грен слем титули“, истакна Французинот.

Враќајќи се во Париз по двегодишна пауза, Ѓоковиќ е поставен како 10-ти носител, а следствено на тоа, тој ќе го започне натпреварувањето од првото, а не од второто коло – што е промена во однос на она на што беше навикнат со години.

„Мала аномалија – нешто што веројатно не му се случило многу долго време. Тоа значи дека својот меч од првото коло ќе го одигра во понеделник или вторник. Ниту едно коло не е лесно, а ова веројатно ќе биде особено предизвикувачко, бидејќи Вашеро – кој, како што видовме, годинава имаше проблеми со повреди – се врати во добра форма и е високо мотивиран да оствари добар резултат. Тој е играч со значителен квалитет. Од друга страна, Новак е малку помалку ефикасен отколку што беше пред неколку години, бидејќи годините неизбежно си го прават своето.“ Доколку го помине Вашеро, Новак во второто коло би можел да се соочи со Лучано Дардери, а во третото со Алекс де Минор, додека во евентуалното четвртфинале би можел да игра против Александар Зверев.

Конкуренцијата е жестока, а Новак сè уште се надева дека ќе се квалификува за завршниот турнир во сезоната. „Има голема напнатост – влогот е огромен, а тенисерите се исклучително мотивирани да ја завршат сезоната меѓу најдобрите осум“, заклучи директорот на Мастерс турнирот во Париз.