Здравствениот инспекторат утврди низа неправилности во постапките на Психијатриската клиника „Свети Иван“ во Загреб во врска со смртта на младиот Кристијан Јосип Периш. Меѓу откриените пропусти се неправилното документирање на постапките за физичко ограничување, како и доцнењето со прегледувањето на снимките од видео-надзорот и известувањето на надлежните органи.
Според наодите на инспекторатот, Периш бил донесен во Клиниката на 21 октомври 2026 година, во 13:36 часот, во придружба на итната медицинска помош и полицијата. Во текот на попладнето, тој добил лекови и бил физички ограничен со помош на ремени. Во вечерните часови се појавила потреба од дополнително ограничување и давање лекови. За време на овие интервенции – кои, според инспекторатот, не биле спроведени во согласност со утврдените протоколи – кај младиот човек настапил срцев застој, пренесува „24сата“.
Здравствениот персонал започнал постапка за реанимација, која потоа ја продолжил тимот на итната медицинска помош, но Периш починал во 21:26 часот. Побарана е обдукција, но конечниот извештај сè уште не е готов.
Снимките се прегледани дури на 4 ноември
Преку увид во медицинската документација и разговори со вработените, инспекторатот утврдил несогласувања во документацијата за постапките на физичко ограничување. Понатаму, постапките на управата по смртта на пациентот отворија дополнителни прашања.
Директорката на Клиниката била известена за смртниот случај на 21 октомври, околу 22:25 часот. Истиот ден бил изготвен извештај за инцидентот, но тој не бил потпишан од сите вработени кои учествувале во интервенцијата.
Според изјавата на директорката, ден по смртта на пациентот, таа усмено побарала од ИТ-одделот да ги зачува снимките од видео-надзорот. Еден ден подоцна, таа била известена дека снимките се зачувани, но ги прегледала дури на 4 ноември. Тогаш, како што навела, биле забележани несоодветни постапки од страна на одредени вработени.
На 5 ноември биле контактирани полицијата и правниот застапник на болницата, а следниот ден снимките ѝ биле предадени на полицијата. Директорката, исто така, писмено го известила надлежниот градски орган за инцидентот. На 7 ноември, на тројца медицински техничари им биле врачени решенија за итен отказ (раскинување на договорите за вработување).
Сериозни прашања за однесувањето на раководството на Клиниката
За време на инспекцискиот надзор, директорката изјавила дека веднаш по смртта на пациентот не се посомневала во никакви неправилности, како и дека не била запознаена со обврската за пријавување на ваков инцидент до Министерството за здравство.
Во рамките на инспекцискиот надзор дополнително ќе се испитува зошто снимката не била прегледана речиси две недели откако била зачувана, зошто Министерството за здравство не било навремено известено, како и кога Управниот совет на Клиниката дознал за инцидентот – и како реагирал на тоа.
Дополнително, ќе се проверува дали претходно имало предупредувања или поплаки во врска со однесувањето на вработените, како и какви мерки презело раководството. Од Заводот за итна медицинска помош на Град Загреб ќе биде побарана документација и изјави од вработените кои биле вклучени во грижата за пациентот.
Прибраната документација ќе биде доставена до Хрватската лекарска комора и Хрватската комора на медицински сестри, со цел стручна проценка на постапките на нивните членови.
Инспекцискиот надзор сè уште не е завршен, бидејќи врз основа на досега собраните податоци не е можно да се утврдат сите околности поврзани со смртниот случај. По спроведувањето на дополнителни проверки, инспекцискиот орган ќе донесе официјална одлука и ќе наложи мерки во рамките на својата надлежност, пренесува „24sata“.
Релевантните институции ја нагласуваат потребата да се утврди одговорноста на сите оние кои можеби не ги исполниле своите обврски, вклучително и директорката на Клиниката и нејзиниот Управен совет.
