Загриженост кај здравствените власти по новите жаришта на ебола во Уганда и Конго

Властите на Уганда денес објавија дека се потврдени три нови случаи на ебола, со што вкупниот број на потврдени случаи се искачи на пет, пренесува „Танјуг“.

Новите случаи вклучуваат возач од Уганда кој го превезувал првиот потврден случај во земјата, како и здравствен работник кој бил изложен на вирусот додека се грижел за истото лице, соопшти Министерството за здравство на Уганда.

Како што објави „Ројтерс“, жена од Конго е третиот нов случај. Светската здравствена организација (СЗО) претходно ја прогласи епидемијата на ебола во Уганда и Конго за вонредна состојба во јавното здравје од меѓународен интерес.

Генералниот директор на СЗО, Тедрос Аданом Гебрехесус, изјави на социјалните мрежи дека епидемијата не ги исполнува критериумите за пандемиска вонредна состојба, но дека постои висок ризик од понатамошно ширење во соседните земји.

Здравствените власти потврдија дека сегашната епидемија е предизвикана од вирусот „Бундибугио ебола“, ретка форма на болеста за која нема одобрени вакцини.

СЗО соопшти дека научниците го идентификувале антивирусниот лек обелдесивир, кој би можел да спречи развој на болеста кај контакти заразени со сојот Бундибугио, и дека работат на организирање клинички испитувања во погодените области.

СЗО предупредува дека епидемијата во регионот претставува ризик за соседните земји и препорачува активирање на национални системи за итни случаи, како и зголемени контроли на границите и главните патишта.

Според Африканските центри за контрола и превенција на болести, вирусот се пренесува преку директен контакт со телесни течности на заразени лица, контаминирани материјали или телата на починатите, и предизвикува висока температура, болки во телото, повраќање и дијареја, а често е и фатален.