Експертот за сообраќај Крунослав Ормуж процени дека заморот на возачот е најверојатната причина за тешката несреќа во која учествуваше автобус со српски регистарски таблички на автопатот А3 во Хрватска, при што загинаа две лица, а 33 беа повредени.
Според неговата проценка, современите безбедносни системи можеле да му помогнат на возачот со тоа што ќе го предупредат дека излегува од својата лента, додека употребата на безбедносни појаси значително би ги ублажила последиците од несреќата.
Во изјава за HRT, Ормуж објасни дека најчестите причини за ваквите несреќи се грешка на возачот или технички дефект. Со оглед на тоа што возилото било релативно ново, како и земајќи ја предвид динамиката на несреќата, тој претпоставува дека возачот најверојатно заспал зад воланот, изгубил контрола над возилото и излетал од патот.
„Системот за помош при одржување на коловозната лента можел да го предупреди возачот дека излегува од патот, а исто така, постојат системи кои го следат однесувањето на возачот и даваат предупредувања доколку се појават знаци на поспаност“, изјави тој.
Тој особено ја нагласи улогата на безбедносните појаси, опишувајќи ги како најважен безбедносен елемент.
Тој смета дека последиците од несреќата – конкретно бројот и сериозноста на повредите – веројатно би биле помали доколку повеќето патници имале врзано безбедносни појаси, пренесува Танјуг. Ормуж потсети на две тешки автобуски несреќи што се случија во последните пет години, кои исто така ги припишува на заморот на возачот.
Во несреќа од 2021 година животот го загубија десетина луѓе, додека во 2022 година, кај Брезнички Хум, загинаа 12 полски аџии кои патувале кон Меѓугорје.
Тој зборуваше и за автопатот А3, истакнувајќи дека тој претставува витална транзитна рута што ги поврзува Источна и Западна Европа и дека во текот на целата година е многу прометен, со голем број товарни возила и автобуси.
Тој заклучи дека самиот автопат не е причина за ваквите несреќи, но дека монотонијата при возењето може да придонесе за појава на поспаност. Тој предупреди дека само неколку секунди невнимание се доволни за да дојде до несреќа.
„При брзина од 100 километри на час, возилото поминува речиси 100 метри за три секунди, затоа, дури и затворањето на очите за краток миг може да има тешки последици“, нагласи тој.
Како дојде до превртување на автобусот на автопатот А3?
„Според досега собраните податоци, несреќата се случила кога државјанин на Република Србија (55), управувајќи автобус со српски регистарски таблички по десната лента од северниот коловоз на автопатот А3 во правец кон Загреб, при пристигнување на 61-виот километар + 200 метри, не го задржал возилото во рамките на означената сообраќајна лента. Наместо тоа, автобусот скршнал десно кон лентата за застанување во случај на нужда, каде што со предниот дел удрил во метална заштитна ограда. Потоа автобусот се навалил, преминал на косиот, неуреден терен покрај автопатот, се превртел и – лизгајќи се – застанал на рамна, тревна површина“, се наведува во извештајот на Окружното државно обвинителство во Велика Горица, изготвен по увидот на лице место.
Во несреќата, која се случи во неделата во 07:24 часот на автопатот А3 во близина на Иваниќ-Град, животот го загубија државјанин на Црна Гора (17) и државјанин на Република Хрватска. Шест патници се здобија со тешки телесни повреди, додека 27 други претрпеа полесни повреди.
Окружното државно обвинителство во Велика Горица наложи обдукција на починатите.
Со цел да се утврдат сите околности поврзани со оваа сообраќајна несреќа, Државното обвинителство ќе наложи изработка на потребните вештачења и ќе преземе други неопходни истражни дејствија, се додава во соопштението
