Најмалку осум лица загинаа откако трикатна зграда се урна покрај градилиште во Бруклин, објави градоначалникот на Њујорк, Зохран Мамдани.
Пожарникарите продолжија да пребаруваат низ урнатините за да пронајдат некој што можеби е заробен под остатоците од зградата.
Зградата се урна вчера попладне. Најмалку 17 лица беа повредени, вклучувајќи тројца пожарникари, изјави градоначалникот Мамдани.
„Нема зборови да се опише толку голема загуба. Моите мисли се со семејствата и најблиските на оние што ги загубивме, со повредените и со сите што тагуваат денес“, напиша Мамдани на социјалната мрежа „Икс“.
Десетици пожарникари и полицајци ја поминаа ноќта обидувајќи се да извлечат луѓе од урнатините.
Причината за уривањето е под истрага, но комесарот за згради во Њујорк, Ахмед Тигани, истакна дека, во времето на уривањето, градежните работници ископувале празен плац до зградата за да изградат нова структура.
Голем дел од остатоците од срушената зграда – имот со мешана намена со станови лоцирани над комерцијалниот простор на приземјето – паднаа во јамата за ископ.
Соседната зграда, која делеше заеднички ѕид со срушената структура, остана да стои; сепак, нејзиниот ѕид беше целосно искинат, оставајќи ги внатрешните простории изложени на надворешноста, пренесува „Бета“.
