Европската мрежа на тимови за активно трагање по бегалци (ENFAST), со поддршка на Европол, започна нова кампања „Најбарани во ЕУ“ (EU Most Wanted), чија цел е лоцирање на 19 бегалци од 14 земји, кои се бараат за кривични дела извршени врз деца и постари лица.
Според соопштението, на листата се наоѓаат лица осомничени за сексуална експлоатација на деца, како и поединци вмешани во измамнички шеми насочени кон постари лица.
Меѓу нив има осомничени против кои се води кривична постапка, како и осудени лица кои избегнуваат издржување на затворска казна. ENFAST и Европол ја повикуваат јавноста да ги погледне профилите на бараните лица на веб-страницата „Најбарани во ЕУ“ и – анонимно – да сподели какви било информации што би можеле да помогнат во нивното лоцирање.
Кампањата опфаќа бегалци што ги бараат Австрија, Белгија, Хрватска, Кипар, Чешка, Естонија, Финска, Франција, Германија, Унгарија, Италија, Луксембург, Полска и Шпанија. Веб-страницата е лансирана во 2016 година, а во текот на изминатата деценија, врз основа на објавените профили, уапсен е 191 бегалец. Во 58 од тие случаи, апсењата биле овозможени благодарение на информации доставени од граѓани. Во текот на 2026 година, уапсени се 16 лица од листата, вклучително и четворица бегалци кои биле лоцирани благодарение на дојави од јавноста.
Европол апелира до граѓаните да не им приоѓаат на бараните лица, туку сите информации да ги достават до надлежните органи преку веб-страницата.
