Судот му наложи на Трамп да ја запре изградбата на балската сала во Белата куќа вредна 400 милиони долари

Федерален апелационен суд на САД ѝ наложи на администрацијата на претседателот Доналд Трамп да ја запре изградбата на балска сала вредна 400 милиони долари на местото на срушеното Источно крило на Белата куќа, задавајќи му голем удар во случај што го тестираше неговиот авторитет, објавува „Ројтерс“.

Апелациониот суд за округот Колумбија со седиште во Вашингтон, со поделени гласови 2-1, ја потврди прелиминарната забрана издадена на барање на Националниот фонд за зачувување на историските споменици, кој ја тужеше федералната администрација минатата година кога беше срушено Источното крило на Белата куќа, а изградбата на балската сала од 89.000 квадратни метри започна без одобрение од Конгресот.

Апелациониот суд во вторник ја одложи пресудата за 14 дена за да ѝ дозволи на администрацијата на Трамп да се жали до Врховниот суд на САД.

Трамп поднесе жалба откако американскиот окружен судија Ричард Леон двапати ги блокираше сите надземни работи на локацијата, но дозволи да продолжат подземните работи.

Адвокатот на Министерството за правда, Јаков Рот, на расправата тврдеше дека судовите немаат улога во оценувањето на приватно финансиран проект и дека би било несоодветно да се блокира, со што судот не се согласи, пренесе „Бета“.