Скандал во Лондон: Џамија под истрага поради храбрење на мажите да ги „дисциплинираат“ жените со удирање

Една лондонска џамија е предмет на истрага откако беа објавени проповеди во кои мажите се охрабруваат да ги „дисциплинираат“ своите сопруги, дури и со удирање, доколку тие се непослушни.

Видеата објавени на каналот на „Исламскиот центар Хакни“ (Hackney Islamic Centre) на YouTube содржат говори во кои се тврди дека жените мора да им се покоруваат на своите сопрузи, вклучително и во ситуации кога сопругот бара сексуална интимност.

Во едно предавање, Јасин Мунџе – познат како „устад“ (учител) – зборува за тоа што исламот го класифицира како „големи гревови“. Тој ги наведува следниве постапки како такви гревови: „непослушност кон сопругот, напуштање на домот без негова дозвола и одбивање на сопругот кога тој ја повикува во постела за интимност – односно, кога жената вели ’не’ без оправдана причина“.

Потоа тој додава: „Советувај ја и избегнувај ја во постелата – не ја допирај – но и дисциплинирај ја физички, удирајќи ја лесно за да ѝ покажеш кој ја има контролата“.

Мунџе исто така тврди дека ако жената продолжи да ја одбива интимноста, сопругот „веќе не е должен да ѝ обезбеди покрив над главата“.

„Ако мажот има повеќе сопруги, тој не мора да остане со неа; може да ја напушти и да биде со друга сопруга сè додека таа повторно не стане послушна“, наведува предавачот.

„Жената мора да му служи на својот сопруг дури и кога тој е лош.“

Мизогини ставови беа изнесени и во други предавања во центарот. Во друго видео, проповедникот Абу Саад Мухамед Ал-Ираки тврди дека жената треба да му служи на својот сопруг дури и ако тој „лошо постапува со неа“.

„Ако тој не е добар кон тебе и лошо постапува со тебе, постои начин: го вклучуваш твоето семејство и разговараш со неговото семејство за да можат да му одржат лекција. Но, мора да му го дадеш она што му следува; во спротивно, не би требало ни да бидеш негова сопруга“, објаснува Ал-Ираки.

„Жените денес веруваат – нашите сестри веруваат – дека треба да бидеш добра кон него само ако тој е добар кон тебе… Но, работите не функционираат така“, додаде тој.

Реакции и пријавување до надлежните органи
Националното секуларно друштво (NSS) го пријави центарот до Комисијата за добротворни организации, предупредувајќи дека таквите ставови – промовирани преку социјалните мрежи – се целосно неспоиви со статусот на хуманитарна и добротворна организација.

Меган Менсон, раководителката за кампањи во NSS, оцени дека е крајно загрижувачки што центарот организира „предавања што директно промовираат насилство врз жените“ и ја застапуваат идејата дека жените немаат право да ги одбијат барањата на своите сопрузи.