Силно невреме ја погоди Австрија, на прагот е пред Балканот!

Силно невреме во четвртокот ги погоди Словенија и Австрија, при што едно лице загина од удар на гром во близина на Целје, а во повеќе области беа пријавени поплави и сериозна материјална штета.

Полицијата во Целје соопшти дека гром погодил две лица кои стоеле под дрво во областа Жалец. 46-годишен маж починал на местото на несреќата, додека другото лице било пренесено во болница со полесни повреди.

Во централна Словенија, поројниот дожд предизвикал поплавување на подруми, оштетување на покриви и соборување на дрвја. Во Подолшева, пак, гром предизвикал пожар во помошна зграда.

Според Информативниот центар на словенечката Дирекција за цивилна заштита и спасување, службите извршиле 51 интервенција, најмногу во подрачјата на Љубљана, Целје, Крањ, Трбовље и Копер. Метеоролозите предупредија дека обилните врнежи ќе продолжат и во петок, поради што за целата земја беше издадено портокалово предупредување.

Заладувањето пристигнува од недела

Невремето предизвика сериозни проблеми и во Долна Австрија, каде за многу кратко време наврнаа големи количества дожд и дојде до брзи поплави.

Најтешка била состојбата во Брук ан дер Лајде, каде пожарникарите до петок наутро добиле околу 400 повици за помош. Во Хаслау на Дунав биле спасувани луѓе од поплавени возила, додека во Марија Еленд паднато дрво оштетило куќа. Штета била пријавена и во Швадорф и Енцерсдорф.

Силното невреме стигнало и до Виена, каде градот, поројниот дожд и силните налети на ветер предизвикале бројни интервенции на противпожарните служби.

Значителна штета е регистрирана и во Бургенланд, каде биле оштетени автомобили, продавници и куќи. Невремето предизвикало и нарушувања во авионскиот сообраќај, со бројни доцнења на летовите од аеродромот Швехат во Виена.