Шакира призна: Моите синови се родија благодарение на песната „Waka Waka“

Во интервју за списанието „Пипл“, Шакира се потсети на моментот што ја одбележа нејзината музичка кариера, но и ѝ го донесе највредното нешто – нејзините синови Милан и Саша.

Во 2010 година, Шакира постигна светска слава благодарение на хитот „Waka Waka (Овој пат за Африка)“, официјалната химна на тогашното Светско првенство.

Песната стана глобален феномен и сè уште се слуша речиси во секоја пригода. Освен што ја одбележа нејзината музичка кариера, пејачката вели дека ѝ донела и голема радост во животот – синовите Милан и Саша.

Во интервју за списанието „People“, Шакира се потсети дека токму тогаш го запознала Жерар Пике, фудбалер со кого подоцна доби деца. Двојката се раздели во 2022 година.

„Затоа ги нарекувам моите деца „Вака-деца“. Верувам дека се родени благодарение на таа песна“, рекла таа и додала: „Таа ме однесе на Светското првенство, кое влијаеше на мојот живот, и од сето тоа се родија тие, најдоброто нешто што ми се случило“.

Таа се потсети и на својот настап во 2014 година, кога повторно ги воодушеви обожавателите со песната „La La La (Brazil 2014)“.

„Бев бремена со Саша, мојот најмлад син, и настапував, а моите обожаватели веднаш почнаа да коментираат: „Шакира е бремена“. Бев бремена само еден или два месеца, но очигледно ме познаваат многу добро“, заклучи таа.

Враќање со уште еден хит
Колумбиската пејачка се врати на Светското првенство синоќа со стил. Таа го изведе својот нов хит „Даи Даи“, а го привлече и вниманието на модните критичари со добро осмислена модна комбинација.