Русија секој месец во Украина губи повеќе од 40.000 војници – вклучувајќи ги загинатите и тешко ранетите – изјави генералниот секретар на НАТО, Марк Руте. Тој ја спореди оваа бројка со вкупните американски жртви претрпени во текот на 14-те години од Виетнамската војна.
Руте ги даде овие изјави на форумот „Атлантска иднина“ (Atlantic Future), како што пренесува „Украинска правда“. Тој оцени дека рускиот претседател Владимир Путин не успева да ги оствари своите цели на бојното поле, и покрај тоа што трпи огромни човечки загуби.
🚨 🚀🇷🇺🇺🇦 NATO Secretary General Mark Rutte claims Russia is suffering heavy battlefield losses in its war against Ukraine:
"Russia's war against Ukraine continues. Putin is failing on the battlefield. In the past few months, Russia has been losing more than 40,000 troops killed… https://t.co/46kIsQ41If pic.twitter.com/aO8EbcLmz3
— Russia News (@russianews_eng) November 12, 2026
„Соединетите Држави изгубија 56.000 луѓе во текот на 14 години во Виетнам. Овде, Русија има 40.000 загинати или тешко ранети за само еден месец. Првичните податоци за октомври сугерираат дека оваа бројка би можела да надмине 50.000. Педесет илјади за само еден месец“, рече Руте.
Според него, поради неуспесите на фронтот, Путин ги засилува нападите врз цивилите и украинската инфраструктура, со цел да го ослаби отпорот на населението пред почетокот на зимата.
Руте, исто така, ја обвини Русија за ескалација на непријателските активности низ Европа, вклучувајќи подметнувања пожари, инциденти поврзани со беспилотни летала и сајбер-напади. Тој изјави дека НАТО одговара на овие дејствија преку обезбедување дополнителна поддршка за Украина.
Алијансата претходно процени дека Русија, само во септември, претрпела повеќе од 50.000 воени жртви, вклучувајќи 28.000 загинати. Според проценката на НАТО од летото, Русија изгубила повеќе од 1,4 милиони војници од почетокот на инвазијата.
