Путин ги претстави изборите, одржани од 18 до 20 септември, како тест за јавната поддршка за војната во Украина – која трае веќе четири и пол години – и за неговата решеност да ја продолжи борбата сè додека не се постигнат клучните воени цели.
Речиси целосните резултати во понеделникот покажаа дека владејачката партија „Единствена Русија“ го задржала убедливото мнозинство во националниот парламент, во рамките на строго контролиран политички систем што ги исклучил повеќето кандидати кои се противат на војната.
Руската Централна изборна комисија објави излезност од 59,3 отсто – бројка за која државната новинска агенција ТАСС извести дека е повисока отколку на повеќето претходни избори за Државната дума, долниот дом на парламентот.
Коментирајќи ги јавно резултатите за првпат, Путин рече дека таквиот „голем, па дури и рекорден број луѓе кои излегле на гласање покажува оти народот на Русија ги поддржува напорите насочени кон зајакнување на земјата“.
За време на телевизиското обраќање денес, Путин директно им се обрати на војниците на фронтот.
„Ова гласање е за вас. Луѓето веруваат во вас, веруваат во нашата победа, веруваат во вашата храброст, во вашето херојство“, рече Путин.
Партијата „Единствена Русија“, која го поддржува Путин, ќе контролира 355 пратенички места – рекорден број – од вкупно 450 во Думата, откако освои повеќе од 57 отсто од гласовите, според речиси целосните резултати објавени во понеделникот.
