По бранот насилство со напади со нож: Поради страв од предизвикот „Крвав петок“, во Полска се уапсени 59 лица, главно ученици

Полската полиција вчера уапси 59 лица – главно ученици кои внеле ножеви во училиште или упатиле закани за убиство и напади преку интернет – за време на голема безбедносна акција спроведена во 35.000 училишта. Операцијата беше поттикната од страв од повторување на нападите со нож што се случија во средата и четвртокот, како и од загриженоста во врска со наводниот интернет-предизвик познат како „Крвав петок“, пренесува „Бета“.

„Извршени се безбедносни проверки во речиси 35.000 училишта, а низ целата земја се приведени 59 лица. До 17:00 часот беа евидентирани 172 инциденти кои бараа активна полициска интервенција поради сомневање за криминални дејствија“, соопшти вечерва полската полиција.

Земјата беше зафатена од паника вчера и денес по нападот во средата во Остроленка (Мазовско Војводство), каде што 19-годишен ученик нападна и избоде девет лица – меѓу кои пет ученици и двајца наставници – а во ранецот му беше пронајдена и рачно изработена експлозивна направа.

Следниот ден, четврток, 15-годишник со нож ги нападна директорот, наставник и училишниот домаќин во основно училиште во Лешчидол-Новини, во истиот регион на Полска; домаќинот им подлегна на повредите за време на транспортот до болницата. Меѓу родителите и децата во Полска почнаа да кружат гласини дека нападите ќе кулминираат денес – наводно како дел од интернет-предизвикот познат како „Крвав петок“ – поради што 46 училишта во регионот Мазовија ја откажаа наставата за тој ден; во меѓувреме, властите вчера распоредија полиција низ целата земја за да ги надгледуваат училиштата и нивната околина.

Иако полските власти – вклучително и министрите и полицијата – утрово се обидуваа да ја уверат јавноста дека не постои таков предизвик како „Крвав петок“, тие сепак признаваат дека постои познат феномен при кој некои млади луѓе се обидуваат да имитираат напади – барем преку фалење дека внеле пластични ножеви во училиштето. Истовремено, медиумите блиски до конзервативните и радикално-националистичките опозициски групи ги повикаа родителите да не ги испраќаат своите деца во училиштата каде што се одржуваше настава.

Вчера наутро, медиумите беа преплавени со извештаи за приведени ученици – главно на возраст од 13 или 15 години. Причините вклучуваа упатување закани на социјалните мрежи или обиди за внесување ножеви, односно пластични играчки што личат на оружје со сечиво, во училиштето; во некои случаи, самите родители ги носеле децата во полициските станици откако откриле дека тие на интернет се фалат со планови за вршење насилство во училиштето.

Во Краков, полицијата интервенираше по пријава за приведување 10-годишно дете, за кое се испостави дека едноставно дошло на училиште во костим за Ноќта на вештерките, носејќи пластична играчка во форма на сатар за месо.

Полскиот премиер Доналд Туск вчера ги осуди нападите, како и културата на говор на омраза и промовирањето насилство и хулиганство – не само на интернет, туку и во политичката арена – и предупреди дека еден од напаѓачите носел камера монтирана на шлем, очигледно со намера да го сними нападот и видеото да го објави на интернет.

По серијата апсења, донесени се и првите одлуки од страна на специјализираните судови за малолетници.

На 19-годишен ученик од Остроленка – сторителот на првиот напад во средата – му е одреден тримесечен притвор, додека 15-годишник, кој во четвртокот во Лешчидол-Новини со нож смртно го рани 37-годишниот домар, е испратен во поправен дом за малолетници.

Некои од малолетниците кои не ги спровеле своите планови, но упатиле закани и ширеле паника на интернет, исто така ќе поминат неколку месеци во поправни домови, додека други биле само сослушани и пуштени дома.