Следниот папа мора да се фокусира на сексуалната злоупотреба од страна на католичките свештеници, рекоа денеска активисти, критикувајќи го недостатокот на акција на последните тројца поглавари на Римокатоличката црква, Франциск, Бенедикт Шеснаесетти и Јован Павле Втори, по ова прашање.
„Ние веруваме дека ова треба да биде централното прашање на конклавата“, рече Питер Ајли, еден од основачите на групата за поддршка на жртвите на злоупотреба СНАП во Рим, презентирајќи веб-страница што ги следи наводите за прикривање од страна на високи црковни службеници.
Папата Франциск, кој почина на 21 април, еднаш ги повтори ветувањата за „нулта толеранција“ дадени од неговиот претходник Бенедикт Шеснаесетти и воведе неколку реформи за решавање на проблемот.
Активистите, сепак, тврдат дека спроведувањето на овие мерки не е задоволително, пренесува Ројтерс.
Бенедикт беше обвинет во извештајот од 2022 година дека не преземал мерки во врска со наводните случаи на сексуална злоупотреба кога бил надбискуп на Минхен од 1977 до 1982 година.
Бенедикт Шеснаесетти, кој поднесе оставка од папството во 2013 година и имаше 94 години кога беше објавен извештајот, подоцна ги призна грешките и побара прошка пред да умре во 2022 година.
Бенедикт, Франциск и Јован Павле Втори, исто така, се соочија со критики за нивните постапки во врска со починатиот поранешен американски кардинал Теодор МекКарик.
Јован Павле Втори, кој ја водеше црквата од 1978 до 2005 година, исто така беше обвинет дека не одговорил на злосторствата на починатиот мексикански свештеник Марсијал Масиел, ватикански собирач на средства, кој исто така бил педофил.
„Правиме сѐ што е во наша моќ за да ја предизвикаме хиерархијата да избере некој кој ја нема истата историја што ја имаше Франциск, што ја имаше Бенедикт, што ја имаше Јован Павле Втори“, рече Сара Пирсон, друга претставничка на СНАП.
Сексуалната злоупотреба беше едно од прашањата што ги покренаа кардиналите во подготвителните дискусии пред конклавата следната недела, соопшти во понеделникот Ватикан.
СНАП и другите групи на преживеани повикаа сите свештеници за кои е докажано дека се сексуални предатори да бидат протерани од црквата и епископите или кардиналите кои се прогласени за виновни за прикривање да бидат отстранети од нивните позиции на власт.
Кардиналот кој беше дисциплински казнет по обвиненијата за сексуална злоупотреба, Жан-Луис Циприани Торн, учествува во преговорите пред конклавата, но нема да учествува на папските избори бидејќи е над максималната возраст за гласање од 80 години.
