Нови случаи на западнонилска треска, Комисијата заседава – се дезинфицира околината на домовите на заболените

Три нови случаи на западнонилска треска се регистрирани во земјава, од кои двајца пациенти се лекуваат на Клиниката за инфективни болести, а еден е хоспитализиран на Клиниката за неврологија. За сите случаи се спроведуваат епидемиолошки анкети, а здравствените власти утврдуваат каде се заразиле пациентите.

Министерот за здравство Сашо Клековски изјави дека Комисијата за заразни болести заседава и ја следи состојбата.

– Станува збор за вектор-пренослива болест. Има случаи кај лица кои не патувале надвор од државата и живеат во скопското поле. Се прават епидемиолошки анкети, а Центарот за јавно здравје ќе врши дезинсекција во радиус од 200 метри околу местото на живеење на потврдените случаи. Дополнително доколку е потребно ќе се спроведува и прскање од земја, додека Институтот за јавно здравје ги мапира сите случаи – изјави Клековски.

Во меѓувреме, на Клиниката за инфективни болести се хоспитализирани седум лица со потврдена западнонилска треска. Директорот на Клиниката, д-р Фадил Цана, информира дека здравствената состојба на еден пациент, 76-годишен скопјанец, и натаму е сериозна.

– Пациентот е сместен на Одделот за интензивна нега, веќе една недела е на Клиниката и е на респираторна поддршка. Тој не патувал надвор од државата – изјави Цана.

Останатите шест хоспитализирани пациенти се постари од 60 години и се во стабилна здравствена состојба. Само едно лице од нив претходно престојувало во Грција.

Според директорот на Клиниката, кај сите хоспитализирани е дијагностицирано вирусно воспаление на мозокот и мозочните обвивки, а најчестите симптоми се висока температура, силна главоболка, дезориентираност и нарушена свест.

Западнонилската треска се пренесува преку убод од инфициран комарец. Периодот на инкубација најчесто трае од три до 14 дена, а кај најголем дел од заразените инфекцијата поминува без симптоми. Сепак, кај мал дел од пациентите, особено кај постарите лица, може да се развијат тешки невроинвазивни форми на болеста кои бараат болничко лекување.(П.А.)