Илија Срдановиќ, лидерот на „Студентската листа – Студентите победуваат“, објави дека синоќа му бил деактивиран профилот на Инстаграм. Тој ја извести јавноста за ова преку видео објавено на Фејсбук.
„Почитувани граѓани на Србија, мојот профил на Инстаграм штотуку беше исклучен. Знајте дека нема да ги згаснат слободата и правдата во Србија. Студентите ќе победат. Србија повторно ќе биде слободна“, изјави Срдановиќ.
Деактивирањето на профилот уследи по реакцијата на Срдановиќ на новата покана од српскиот претседател Александар Вучиќ за телевизиска дебата.
Вучиќ ја упати поканата преку Инстаграм, на што Срдановиќ одговори со кратка порака од четири збора: „Да се биде игнориран е многу болно“.
Со оваа порака, Срдановиќ алудираше на фактот дека на Вучиќ наводно најмногу му пречи кога некој го игнорира.
Неколку часа по објавата, профилот на Срдановиќ на Инстаграм веќе не беше достапен.
Ова е втора покана од Вучиќ за телевизиски дуел. Срдановиќ на првата покана – упатена претходно преку медиумите – одговори дека ќе разговара само со оние „кои имаат што да кажат и навистина знаат нешто“.
По деактивирањето на неговиот профил, Срдановиќ изјави дека, без оглед на тоа што се случило со неговиот профил на социјалните мрежи, верува оти борбата за слобода и правда во Србија не може да биде згасната.
