Никола Тесла, еден од најголемите пронаоѓачи во историјата, бил познат не само по своите револуционерни откритија, туку и по своите необични животни навики.
Неговиот секојдневен живот бил подреден на работата и дисциплината, а особено внимание обрнувал на исхраната. Верувал дека човечкото тело, исто како машина, може да функционира подобро ако се одржува правилно.
Меѓу храната што особено ја ценел бил еден многу обичен зеленчук – целер. Со години го консумирал во комбинација со кромид и путер, сметајќи го таков оброк за лесен за варење и погоден за неговиот животен стил.
Неговата склоност кон целерот е запишана во постар извор, интервју што го дал за американското списание „Физичка култура“ во 1935 година, на 78-годишна возраст. Во разговор со новинарот Џорџ Ф. Корнерс, Тесла открил како се храни, која храна ја избегнува и што смета дека е клучно за одржување на здравјето.
Во едно интервју насловено како „Младоста и силата на Никола Тесла на 78 години“, Тесла го споредил човечкото тело со машина на која ѝ е потребно соодветно гориво за правилно функционирање. Тој ја сметал исхраната за еден од најважните фактори за неговото здравје и способност за работа, а особено го нагласувал зеленчукот, за кој верувал дека помага во варењето и му обезбедува на телото важни витамини и минерали.

Меѓу неговите омилени јадења, тој издвоил варена мешавина од кромид и сечкан целер, подготвена со многу путер. Објаснил дека таквата комбинација му е доволна, лесна за варење и е важен дел од неговата исхрана со години.
Тесла имал и други необични правила во исхраната. Верувал дека два оброка дневно се доволни и дека ручекот непотребно го оптоварува телото. Особено ги ценел млекото и белките од јајца, додека ги избегнувал жолчките од јајца. Според неговите сопствени зборови, јадел месо многу ретко, понекогаш само еднаш или двапати годишно.
Го сметал кафето и чајот за штетни стимуланси, иако признал дека претходно бил голем пијач на кафе.
Целерот е зеленчук богат со вода, со малку калории и одредени количини на витамини, минерали и растителни соединенија. Според Министерството за земјоделство на САД, околу 95 проценти од неговата маса е вода. 100 грама суров целер содржи приближно 1,6 грама влакна, 260 милиграми калиум, како и витамин К и други хранливи материи. Поради високата содржина на вода, може да придонесе за дневна хидратација на телото, додека влакната се корисни за нормално функционирање на дигестивниот систем.
Посебно внимание на научниците привлекуваат растителните соединенија во целерот, меѓу кои се флавоноидите и фенолните соединенија со антиоксидантни својства. Антиоксидансите учествуваат во заштитата на клетките од оксидативно оштетување, а одредени состојки на целерот се испитуваат и за нивните можни ефекти врз нервниот систем.












