Израелскиот премиер Бенјамин Нетанјаху во интервју за ABC News изјави дека не ја исклучува можноста за атентат врз врховниот лидер на Иран, ајатолахот Али Хамнеи, тврдејќи дека таков потег „нема да го влоши конфликтот, туку ќе го прекине“.
Нетанјаху: Ова е заштита на човештвото
На директно прашање дали Израел ќе го таргетира врховниот лидер, Нетанјаху одговори: „Ние го правиме она што мораме да го направиме. Веќе ги таргетиравме нивните врвни нуклеарни научници. Сè уште имаме работа на други локации“, додаде тој.
Нетанјаху, исто така, рече дека нападите на Израел врз Иран биле насочени кон она што го нарече „заштита на човештвото“ од нуклеарната закана на Иран.
„Денес Тел Авив е цел, утре може да биде Њујорк“, рече Нетанјаху. „Ја разбирам политиката „Америка прва“, но не ја разбирам „Америка мртва“.
Трамп наводно го отфрлил израелскиот план за атентат
Претходно, Ројтерс објави дека сегашниот американски претседател Доналд Трамп го отфрлил израелскиот предлог за атентат врз ајатолахот Хамнеи, повикувајќи се на двајца високи американски функционери. Според нив, предлогот бил даден во последните неколку дена, но Трамп ставил вето на планот.
Нетанјаху ги негираше тврдењата во интервју за Фокс њуз: „Постојат многу лажни извештаи за разговори што никогаш не се случиле и нема да навлегувам во тоа. Но, можам да кажам дека ќе направиме што треба да направиме. И мислам дека Соединетите Држави знаат што е добро за нив.“
Тој додаде дека израелските напади ќе престанат само кога ќе бидат отстранети сите нуклеарни капацитети на Иран.
Ајатолахот Али Хамнеи, кој има 85 години, е врховен лидер на Иран од 1989 година и е најмоќната политичка и религиозна фигура во земјата. Неговиот авторитет ги надминува сите други институции, вклучувајќи го претседателот и парламентот, и има клучна улога во обликувањето на надворешната политика и нуклеарната програма на Иран.
