Необичен инцидент во Германија: Крадец влегол во кафуле среде ноќ, касата не ја ни допрел – си заминал со торта и кутии сладолед

Неидентификуван крадец провалил во кафуле во германскиот град Бад Салцуфлен, но наместо да земе пари од касата, си заминал со торта и две кутии сладолед.

Провалата се случила во текот на ноќта меѓу петокот и саботата, околу 2:30 часот наутро, во кафуле на улицата Паркштрасе (Parkstraße), веднаш до градскиот бањски парк. Бад Салцуфлен се наоѓа во сојузната покраина Северна Рајна-Вестфалија.

Полицијата во Липе соопшти дека крадецот влегол во кафулето и однел „невообичаен плен“ – една торта и две пакувања сладолед.

Според агенцијата dpa, крадецот воопшто не се обидел да ја отвори касата; го интересирале само слатките. Откако ги зел, тој побегнал.

За полицијата останува нејасно зошто провалил токму поради такви производи.

„Не знаеме дали намерно ги барал слатките задоволства или едноставно огладнел за време на провалата“, изјави портпарол на полицијата за dpa.

Полицијата сè уште трага по сторителот и ги повика сите што забележале нешто сомнително во времето на провалата да се јават.