Лагард: Инфлацијата веројатно ќе остане висока

Инфлацијата веројатно ќе остане висока во блиска иднина, а Европската централна банка (ЕЦБ) ќе ја разгледа деталната структура на базичната инфлација за да ги одреди следните чекори во однос на каматните стапки следниот месец, изјави претседателката на ЕЦБ, Кристин Лагард.

Таа истакна дека не може со сигурност да каже дали ЕЦБ ќе ги зголеми каматните стапки во декември, но додаде дека би биле потребни значителни промени за ситуацијата да се одвива поинаку од она што моментално се очекува, пренесува Mina-business.

„Знаеме дека стапките на инфлација ќе останат високи во наредните квартали“, рече Лагард во интервју за јапонскиот весник „Јомиури Шимбун“.

Таа додаде дека колку се повисоки овие стапки и колку подолго остануваат на високо ниво, толку е поголем ризикот за среднорочната цел на ЕЦБ, пренесува „Танјуг“.

„Внимателно ги следиме индикаторите што укажуваат на идните трендови, како и повеќегодишните договори за плати и очекувањата на компаниите во однос на платите; засега не гледаме знаци за промена на трендот“, рече Лагард. Со оглед на тоа што вкупната инфлација во еврозоната е двојно повисока од целта на ЕЦБ од 2%, а економијата продолжува стабилно да расте, некои претставници најавија можно дополнително зголемување на каматните стапки за четвртина процентен поен следниот месец.

Ова би претставувало продолжување на постоечкиот тренд, по два слични потези преземени откако војната во која е вклучен Иран предизвика остар скок на цените на енергенсите.

Клучното прашање, сепак, е колкаво заострување на монетарната политика може да издржи овој валутен блок од 21 земја, без притоа да се загрози економскиот раст.

Уште едно зголемување на каматните стапки би ги турнало трошоците за задолжување до горната граница на опсегот во кој нивното влијание врз економијата се смета за безопасно.

Минатиот месец, Лагард најави дека ќе се повлече од својата функција во февруари – околу девет месеци пред истекот на нејзиниот мандат.