Францускиот министер за финансии Ролан Лескјур изјави дека повиците за забавување на развојот на вештачката интелигенција им одат во прилог на водечките американски компании. Лескјур смета дека Франција и Европа, напротив, мора да го забрзаат сопствениот развој за да можат да управуваат со поврзаните ризици, пренесува „Ројтерс“.
„Гледам дека повиците за пауза доаѓаат од оние што веќе се на врвот. Тие сакаат да ги забават сите други за да ја задржат својата предност. Нивниот интерес овде е сосема јасен“, рече Лескјур во интервју за Ројтерс. „Мојата цел е Франција и Европа да ги засилат своите напори, да станат лидери во оваа област и на тој начин да стекнат способност да управуваат со ризиците“, додаде тој.
